15 organizata shqiptare përfaqësuese të gazetarëve dhe të të drejtave të njeriut dënuan miratimin e paketës anti-shpifje nga kuvendi një ditë më parë.
Me anë të një njoftimi për shtyp, organizatat theksuan se ligjet e miratuara janë në kundërshtim të hapur me Komisionin Europian dhe Zyrën e Komisioneres së Lartë për të Drejtat e Njeriut të Këshillit të Europës.
Ata i bënë thirrje Presidentit Meta të mos e dekretojë atë dhe premtuan se do të angazhohen ta luftojnë dhe ligjërisht vendimin e qeverisë, duke i dërguar ligjet në gjykatat shqiptare apo në Gjykatën Europiane të të Drejtave të Njeriut.
Po ashtu, organizatat lajmëruan nisjen e një fushatë të gjerë informimi dhe ndërgjegjësimi të publikut mbi lirinë e shprehjes dhe lirinë e medias.
Rrjeti i organizatave u zotua të mbështesë çdo gazetar që mund të përballet me padrejtësitë që mund të prodhojnë këto ligje dhe I bënë thirrje kolegëve gazetarë që të vijojnë punën për të raportuar drejtë dhe saktë dhe të mos frikësohen nga ekzistenca e këtyre ligjeve regresive.
Organizatat firmëtare janë:
- Këshilli Shqiptar i Medias
- Lidhja e Gazetarëve të Shqipërisë
- Qendra Shqiptare MediaLook
- Qendra Shqiptare për Gazetari Cilësore
- Shoqata e Gazetarëve Profesionistë të Shqipërisë
- Unioni i Gazetarëve Shqiptarë
- BIRN Albania
- Citizens Channel
- Faktoje
- Instituti Shqiptar i Medias
- Civil Rights Defenders
- Instituti Shqiptar i Shkencave
- Komiteti shqiptar i Helsinkit
- Qendra Res Publica
- Grupi shqiptar në mbrojtje të të drejtave të njeriut
