Gjykata e Lartë mbyll aplikimet për KLGJ-në, shpall listën përfundimtare

Gjykata e Lartë publikoi sot listën e re të kandidatëve për Këshillin e Lartë Gjyqësor, bashkë me dy kandidatët e vetëm që aplikuan në thirrjen e dytë për gjyqtarë nga gjykatat e apelit jashtë Tiranës, hapur dy javë më parë, në shkelje të ligjit, nga kreu i Gjykatës së Lartë.

Dy kandidatët e rinj janë: Brikena Ukperaj, gjyqtare në Gjykatën e Apelit Vlorë, anëtare e Këshillit të Emërimeve të Drejtësisë të vitit 2017, e cili e kaloi vetingun më 25 qershor; dhe Luan Dervishi, gjyqtar në Gjykatën e Apelit Shkodër, i cili pret të përballet me KPK-në si kandidat për Gjykatën Kushtetuese.

Lista përfundimtare me gjyqtarët që plotësojnë kushtet ligjore për t’u zgjedhur anëtarë të KLGJ-së është:

Nga Gjykatat e Rretheve Gjyqësore:

  1. Alma Brati – Gjykata e Rrethit Gjyqësor Tiranë
  2. Astrit Faqolli – Gjykata e Gjyqësor Rrethit Tirane
  3. Brunilda Kadi – Gjykata e Rrethit Gjyqësor Tiranë
  4. Manjola Xhaxho – Gjykata e Rrethit Gjyqësor Tiranë
  5. Marçela Shehu – Gjykata e Rrethit Gjyqësor Kurbin
  6. Dritan Hallunaj – Gjykata e Shkallës së Parë për Krime të Rënda

Nga Gjykatat e Apeleve:

  1. Ilir Toska – Gjykata e Apelit Tiranë
  2. Nertina Kosova – Gjykata e Apelit për Krime të Rënda
  3. Luan Dervishi – Gjykata e Apelit Shkodër
  4. Brikena Ukperaj – Gjykata e Apelit Vlorë

Nga Gjykata e Lartë:

  1. Medi Bici – Gjykata e Lartë

Sipas Ligjit 115/2016 “Për organet e qeverisjes të sistemit të drejtësisë”, 6 anëtarët e KLGJ-së duhet të jenë nga gjykata të niveleve të ndryshme:

a) tre prej të zgjedhurve janë gjyqtarë të shkallës së parë. Së paku 1 prej tyre është gjyqtar në një gjykatë të shkallës së parë jashtë Tiranës;

b) dy prej të zgjedhurve janë gjyqtarë të apelit. Së paku 1 prej tyre është gjyqtar në një gjykatë të apelit jashtë Tiranës;

c) një prej të zgjedhurve është gjyqtar në Gjykatën e Lartë.