Informalitetit, policia arreston 5 nëpunës për shpërdorim detyre

Informalitetit, policia arreston 5 nëpunës për shpërdorim detyre

Aksioni i qeverisë kundër informalitetit në sezon turistik ka goditur edhe administratën publike.

Policia njoftoi sot se kishte arrestuar 5 nëpunës të shtetit për shpërdorim detyre, ndërsa ndaj 25 të tjerëve tha se kishte nisur hetimet po me të njëjtën akuzë.

Lutfi Minxhozi, drejtues i Drejtorisë së Hetimeve të Krimeve Ekonomike, tha në një konferencë për shtyp se aksioni policor ishte koordinuar me Drejtorinë e Përgjithshme të Tatimeve, Doganat dhe autoritetet lokale dhe se shkonte paralelisht me përpjekjen e qeverisë për të luftuar informalitetin.

Edhe pse nuk u përmend asnjë emër nga të arrestuarit, njëri prej tyre u tha se është drejtues i një njësie administrative në Fier, ndërsa katër të tjerët janë punonjës të tatim-taksave në Bashkinë e Shkodrës.

Aksioni policor ndaj nëpunësve vjen pas një serie kontrollesh ndaj bizneseve në pikun e sezonit turistik.

Sipas Minxhozit autoritetet kanë ushtruar mbi 800 kontrolle, nga të cilat 467 në shërbimet e vend-pushimeve në plazhe, 162 lokale, 83 hotele.

Minxhozi tha se policia kishte pikasur 89 raste shkeljesh të ligjit dhe se për këto qenë nisur procedurat e ndjekjes penale, por për këto raste Minxhozi nuk dha shifra apo emra.

Sidoqoftë ai tha se shkeljet ishin: mos-lëshim kuponi tatimor, fshehje e të ardhurave, ushtrim aktiviteti pa leje, mospagim i taksave dhe tatimeve, ndërtim i paligjshëm etj.

Dyshohet se nëpunësit e ndjekur penalisht nga policia kanë favorizuar këto aktivitete në zonat e tyre.

Për të Minxhozi paralajmëroi se “vëmendja kryesore e Policisë do të përqendrohet në zbulimin, dokumentimin dhe procedimin penal të çdo zyrtari bashkiak, tatimesh, doganash etj, të cilët me dashje nuk kanë kryer detyrat dhe kanë lejuar informalitetin”.

Adresa juaj e emailit nuk do bëhet publike.

Lajme te ngjashme