Rehablitimi i Parkut Rinia vazhdon me shkulje pemësh

Nga Gerard Gega
Rehablitimi i Parkut Rinia vazhdon me shkulje pemësh Facebook/Disa foto e pemës së rrëzuar në Parkun Rinia.

Rrëzimi i një peme nga punimet që po bëhen në rehabilitimin e parkut Rinia zemëroi shumë qytetarë ditën e dielë.

Fotot e pemës së rrëzuar u qarkulluan vrullshëm në rrjetet sociale, pasi kjo është hera e parë që në parkun Rinia fotografohen dëmtime të gjelbërimit prej projektit që u propagandua se do të bënte të kundërtën.

Që prej muajit korrik zona është e rrethuar dhe qytetarët nuk kanë patur akses në të. Aty punohet për një projekt rehabilitues, i cili betonizon një pjesë të konsiderueshme të parkut duke krijuar relieve dhe sheshe.

Projekti i rehabilitimit të parkut Rinia, ku në disa pjesë të tij parashikohet krijimi i disa shesheve.

Urbanizimi i parkut u denoncua që në prill të vitit të shkuar, ndërsa projekti u bë publik vetëm në gusht të 2018-ës, nga një studio që e kishte punuar atë.

Facebook/Foto e pemës së rrëzuara në Parkun Rinia.

Parku Rinia u konceptua në vitet ’30 nga arkitektët italianë Armando Brasini dhe Florestano Di Fausto, por ideja e tyre u tjetërsua gjatë regjimit komunist.

Më 1949-ën, për 5-vjetorin e çlirimit të vendit, zona u mboll me pemë nga nxënës të shkollave të Tiranës, gjë për të cilën u quajt më pas edhe “Parku Rinia”.

Në vitet ’90 ky park u zu me kioska dhe ndërtime pa leje, të cilat u prishën në vitin 2001 nga një vendim i qeverisë së asaj kohe.

Prej rreth 20 vitesh, Parku Rinia nuk ka patur ndryshime pozitive për sa i përket gjelbërimit. Ndërkohë shumëkush e ka parë atë si mundësi për biznes duke kërkuar dhe përfituar edhe koncesion parkingu nëntokësor.

Në fakt projekti aktual i rehabilitimit po bëhet përpara ndërtimit të këtij parkingu, i cili u dha me koncesion në vitin 2015 nga kryebashkiaku Erion Veliaj.

Adresa juaj e emailit nuk do bëhet publike.

Lajme te ngjashme