Ish kryebashkiaku në kërkim Kajmaku, kundërshton vendimin e arrestit me burg

Ish kryebashkiaku në kërkim Kajmaku, kundërshton vendimin e arrestit me burg

Ish kryebashkiaku i Vorës Agim Kajamku apeloi sot vendimin e Gjykatës së Krimeve të Rënda, e cila vendosi masën arrest me burg. Zoti Kajmaku aktualisht është në kërkim nga policia shqiptare.

Përpara disa ditësh Prokuroria kërkoi arrestimin e ish kryebashkiakut të Vorës Kajmaku, për shkak të fshehjes së të shkuarës së tij në formularët e dekriminalizimit.

Më 1 nëntor Komisioni Qëndror i Zgjedhjeve shkarkoi nga detyra Zotin Kajmaku, pasi ai nuk kishte deklaruar arrestimin dhe hetimin në Greqi për përdorim parash të falsifikuar, nën identitetin e rremë Jorgo Toto.

Pas denoncimit të Partisë Demokratike, faktet e mësipërme u vërtetuan nga prokuroria, nëpërmjet shenjave të gishtave.

Sipas ligjit të dekriminalizimit, kush gënjen në formularin e dekriminalizimit shkarkohet nga funksioni publik dhe dënohet me burg nga 6 muaj deri në 4 vjet.

Që prej muajit gusht PD ka denoncuar fshehjen e së shkuarës së kryebashkiakut Agim Kajmaku. Ky i fundit ka mohuar të jetë arrestuar, apo hetuar.

Përveç Kajmakut, demokratët kanë akuzuar edhe dy socialistë të tjerë, kryebashkiakun e Vaut të Dejës, Mark Babani dhe kandidatin për Shkodrën, Valdin Pjetri, ky i fundit u tërhoq nga marrja e mandatit pasi akuzat u vërtetuan.

1 koment

Adresa juaj e emailit nuk do bëhet publike.

Lajme te ngjashme