OSBE thirrje qeverisë të rishikojë paketën anti-shpifje kthyer nga Presidenti

Nga Exit News
OSBE thirrje qeverisë të rishikojë paketën anti-shpifje kthyer nga Presidenti Kryeministri Rama dhe përfaqësuesi i OSBE-së, Desir.

Përfaqësuesi i OSBE-së për Lirinë e Medias, Harlem Desir, deklaroi të hënën se është i gatshëm të punojë me qeverinë për të përmirësuar dy ligjet e mediave online të kthyera për rishqyrtim nga Presidenti Ilir Meta.

Pas vrojtimit të argumenteve të Presidentit, Desir thotë se zyra e tij mund të ndihmojë qeverinë veçanërisht në përmirësimin e çështjeve që lidhen me gjobat dhe parimin e proporcionalitetit. Në deklaratën e shpërndarë për mediat OSBE thotë:

“Përfaqësuesi i OSBE-së [Harlem Desir] thekson se asgjë në legjislacionin e ri nuk duhet të pengojë lirinë e shprehjes dhe lirinë e mediave. Ai shpreson që rishqyrtimi të lejojë qartësime dhe përmirësime të mëtejshme të ligjeve për të siguruar përputhjen e plotë të tyre me standardet ndërkombëtare dhe angazhimet e OSBE-së.”

Këtë fundjavë, Presidenti Ilir Meta ktheu për rishqyrtim në parlament dy ligjet – “Për median audiovizive” dhe “Për komunikimin elektronik” – etiketuar nga qeveria si “paketa anti-shpifje”. Ai argumentoi se ato shkelin parimet kushtetuese, të drejtën e lirisë së shprehjes, shtypin dhe të drejtën e informacionit, si dhe Konventën Evropiane për të Drejtat e Njeriut.

Meta i bëri thirrje Parlamentit që të rishikojë ligjet në përputhje me rrethanat. Vendimi i tij u përshëndet nga Reporterët pa Kufij.

Kryetari i grupit parlamentar të Partisë Socialiste Taulant Balla tha sot se Presidenti Meta ishte urdhëruar nga lideri i opozitës Lulzim Basha që të mos i dekretonte ligjet. Ai theksoi se “më 20 janar dekretet i njoftohen Kuvendit, dhe në seancën më të parë do të rrëzohen.”

“Dua të ritheksoj që përmirësimet ligjore u vërtetuan plotësisht nga një partner i rëndësishëm, OSBE, gjithashtu në kuadrin e faktit historik që Shqipëria ka nderin të udhëheqë këtë organizatë […]”, shtoi ai.

Kryeministri Edi Rama ka deklaruar gjithashtu se Përfaqësuesi i OSBE-së për Lirinë e Medias ishte dakordësuar me versionin përfundimtar para miratimit në Parlament. Sidoqoftë, në një intervistë për Exit News, zoti Desir tha se përkundër përmirësimeve të bëra në draftet përpara miratimit, zyra e tij ende kishte shqetësime për disa nga përmbajtjet e ligjeve.

Mazhoranca Socialiste hodhi poshtë kritikën e ashpër nga gazetarët, organizatat e mediave vendase dhe ndërkombëtare, Këshilli i Evropës, dhe Anëtarët e Parlamentit Evropian, dhe më 18 dhjetor 2019, miratoi ligjet në Parlament.

Kushtetuta shqiptare parashikon që Presidenti mund të kthejë një ligj në Parlament vetëm një herë. Shumica e deputetëve mund t’i rishikojnë ligjet ose të rrëzojnë dekretin e Presidentit dhe të kalojnë ligjin me një shumicë të thjeshtë.

4 komente

    Adresa juaj e emailit nuk do bëhet publike.

    Lajme te ngjashme