Banka e Shqipërisë raporton se kreditë e këqija arritën në 21,35 për qind të totalit të kredive, në muajin tetor 2016. Krahasuar me dhjetorin e vitit 2015, kreditë e këqija janë rritur me 3,13 pikë për qindje.
Që prej dhjetorit të vitit të kaluar, kreditë e këqija kanë vazhduar të rriten, pavarësisht masave të ndryshme që janë marrë nga qeveria apo Banka e Shqipërisë.
Në dhjetor 2015, Banka e Shqipërisë dhe Ministria e Financave ranë dakort që bankat e nivelit të dytë të fshijnë nga bilancet e tyre kreditë e konsideruara si përfundimisht të pambledhshme, duke i kontabilizuar ato si shpenzime të zbritshme, gjë që më parë nuk lejohej (lexo këtu për më shumë).
Fshirja e kredive të këqija bëri që në dhjetor 2015 niveli i kredive të këqija të ulej, menjëherë, nga 20,38 për qind në 18,22 për qind. Sipas ministrit të atëhershëm të Financave Shkëlqim Cani, ulja e portofolit të kredive me probleme do të gjallëronte ekonominë, ndaj zbatimi i planit për të ulur kreditë shihej si domosdoshmëri.
Kjo nismë artificiale që u dha mundësi bankave të ulnin në letër volumin e kredive të pambledhshme, nuk pati asnjë ndikim real në ekonomi edhe pse u reklamua nga qeveria si përmirësim i gjendjes ekonomike.
Për më tepër, Banka e Shqipërisë, prej 2011-ës, ka ulur vazhdimisht normën bazë të interesit, që aktualisht është në nivelet e saj më të ulta historike—1,25 për qind—me qëllim për të ulur normat e interesit të kredive të bankave dhe për të nxitur kështu kredimarrjen.
Megjithatë, vetëm 11 muaj më pas, kreditë e këqija janë rritur me 3,13 pikë përqindje nga niveli i ulur artificialisht i dhjetorit 2015—pra, më shumë edhe se ulja artificiale.
Duket se asnjë nga masat e qeverisë apo të Bankës së Shqipërisë nuk ka rezultuar e suksesshme për të ulur realisht kreditë e këqija dhe për të përmirësuar raportet financiare mes bankave dhe debitorëve të tyre.
Kreditë e këqija janë rrezik i qartë për falimentimin e disa bankave që do të ishte goditje me pasoja të rënda për ekonominë.
