Aeroporti i Vlorës mund të ndërtohet në zonë të mbrojtur, kundërshton Shoqata e Mjedisit

Aeroporti i Vlorës mund të ndërtohet në zonë të mbrojtur, kundërshton Shoqata e Mjedisit

Shoqata për Ruajtjen dhe Mbrojtjen e Mjedisit Natyror në Shqipëri ka kundërshtuar sot vendimin e Qeverisë Rama për ndërtimin e aeroportit në Vlorë, në zonën Akërni, pjesë e zonës së mbrojtur Vjosë-Nartë.

“Ndërtimi i një aeroporti të ri, është padyshim një lajm i përgëzueshëm dhe i mirëpritur për shumicën e publikut, megjithatë vendndodhja e propozuar e ndërtimit të këtij aeroporti është e papërshtatshëm dhe mjaft e dëmshme për natyrën dhe biodiversitetin e lartë të zonës”, shkruhet në deklaratën e Shoqatës.

Sipas përfaqësuesve të shoqatës, një ndërtim i tillë bie ndesh me ligjet dhe rregulloret për zonat e mbrojtura. Ndërtimi dhe menaxhimi i një infrastrukture të tillë në një zonë të mbrojtur do të shkatërrojë në mënyrë të pakthyeshme Peizazhin e Mbrojtur Vjosë-Nartë.

Shoqata në mbrojtje të mjedisit i kërkon qeverisë të rikonsiderojë vendin për ndërtimin e aeroportit dhe i ofron asaj bashkëpunimin si teknik, ashtu dhe shkencor në vlerësimin e vendndodhjeve alternative që nuk dëmtojnë zonat e mbrojtura.

Lajmi për ndërtimin e një aeroporti në Vlorë u bë publik, papritur dje. Kryeministri Rama, përmes një postimi në Facebook, njoftoi se qeveria mori një “kërksesë zyrtare” për ndërtimin e aeroportit të Vlorës. Kryeministri gjithashtu njoftoi se punimet do të fillojë në qershor të këtij viti.

Lajme te ngjashme

Më të lexuarat

Dërgo informacion në mënyrë konfidenciale

Nëse keni informacion në interes të publikut mund ta dërgoni te redaksia e Exit duke zgjedhur te mbeteni anonim nëse dëshironi.

Mënyrat e dërgimit >>