Ambasada Amerikane njoftoi sot qytetarët shqiptarë se për shkak të pandemisë së Covid-19, ka pezulluar të gjitha intervistat dhe shërbimet e tjera për dhënien e vizave.
Përmes një njoftimi në Facebook, ambasada sqaron se për momentin ofron vetëm shërbime në raste emergjencash:
“Në përgjigje të sfidave mbarë botërore lidhur me pandeminë COVID-19, Departamenti i Shtetit pezulloi shërbimet rutinë të vizave në të gjitha Ambasadat dhe Konsullatat Amerikane duke filluar nga data 20 mars 2020. Ambasadat dhe Konsullatat kanë anulluar të gjitha takimet rutinë të vizave dhe shërbimeve për qytetarët amerikanë. Ambasada e Shteteve të Bashkuara në Tiranë ofron vetëm shërbime në raste emergjencash.”
Për rifillimin e shërbimeve, ambasada do të lajmërojë në një njoftim të dytë.
