Ambasadorët e SHBA-vë, Francës, Gjermanisë, Italisë dhe Britanisë së Madhe në Kosovë i kanë kërkuar politikanëve kosovarë që të fokusohen tek lufta kundër koronavirusit dhe jo tek luftrat politike.
Në një njoftim për shtyp, ambasadat shkruajnë:
“Në këtë kohë të vështirë, ne u bëjmë thirrje të gjithë liderëve institucionalë dhe politikë që të përqëndrohen në luftën kundër COVID-19 duke respektuar dispozitat e Kushtetutës dhe fuqitë që u janë dhënë atyre përmes Kushtetutës.
Ne i nxisim ata të ruajnë dhe sigurojnë integritetin dhe funksionalitetin e qeverisë dhe institucioneve të Kosovës në këtë moment kritik dhe t’i japin përparësi luftës kundër COVID-19 mbi politikën.”
Qeveria e Kosovës po përballet me një krizë të rëndë vetëm disa javë pas marrjes së pushtetit, pasi LDK, anëtare e koalicionit po kërcënon të dalë nga qeveria.
Kjo pasi Kryeministri Albin Kurti shkarkoi Ministrin e Brendshëm Agim Veliu të Lidhjes Demokratike të Kosovës (LDK) për shkak se Veliu kishte kundërshtuar publikisht qasjen e qeverisë për të mos mbështetur propozimin e Presidentit Thaçi për shpalljen e gjendjes së jashtëzakonshme, si dhe kishte nxitur panik në publik për shpejtsinë e përhapjes së koronavirusit në Kosovë.
Udhëheqësi i LDK-së, Isa Mustafa e quajti shkarkimin si “të papranueshëm dhe në shkelje të marrëveshjes së koalicionit qeverisës [midis LVV dhe LDK]” dhe ka paralajmëruar mbledhjen e firmave për të bërë mocion mosbesimi kundër kryeministrit Kurti.
