Burime për Exit.al bëjnë me dije se ambasadorja e BE-së Romana Vlahutin ka kërkuar të zgjasë me një vit qëndrimin e saj në Shqipëri. Mandati i saj duhet të mbarojë në vjeshtë 2018.
Kroatja Vlahutin u emërua Kryetare e Delegacionit të BE-së në Tiranë në vitin 2014, pas përfundimit të mandatit katër vjeçar të italianit Ettore Sequi.
Pak ambasadorë të BE-së kanë kërkuar në të shkaurën dhe kanë marrë shtyrje të mandatit të tyre. Numri i tyre është ulur edhe më shumë vitet e fundit.
Arsyeja zyrtare e kërkesës së Ambasadores Vlahutin për shtyrje të mandatit nuk dihet ende, por mund të lidhet me përpjekjen e saj të vazhdueshme për të siguruar një karrierë brenda BE-së ose burokracisë ndërkombëtare.
Ambasadorja Vlahutin është një nga dy ambasadorët e BE-së të emëruar politikisht nga Kroacia, si pjesë e kuotave të vendeve anëtare në psotet politike të BE-së. Emërimi tjetër kroat është ambasadori i BE-së në Taxhikistan.
Përpara se të bëhej ambasadore e BE-së në Shqipëri, Vlahutin shërbeu si këshilltare e Presidentit të Kroacisë, dhe ka qenë një nga njerëzit më të afërt të tij. Për shkak të kësaj afërsie, ajo u shpërbleu nga shefi i saj me një nga dy postet politike që mori Kroacia në BE me anëtarësimin e saj në BE.
Në vitin 2015, komisioni parlametar kroat për konfliktet e interesit zhvilloi një hetim për Zonjën Vlahutin, pasi kishte dyshime për fshehje të pasurisë dhe falsifikim të deklaratave të pagave e pasurive të paluajtëshme. Pavarësisht vërtetimit të këtyre akuzave, komisioni vendosi të mos ndërmarrë masa ndaj zonjës Vlahutin meqë ajo nuk paguhej më nga Kroacia, por nga Bashkimi Evropian.
Figura e ambasadores Vlahutin në Shqipëri u dëmtua pas bërjes publike të blerjes së një vile 1,6 milionë euro në një komples luksoz të ndërtuar nga një prej oligarkëve shqiptarë. Kohët e fundit ka pasur raportime të pakonfirmuara se OLAF, agjencia kundër-mashtrimeve financiare e BE-së ka filluar një hetim mbi rolin e ambasadores dhe gjithë delegacionit të BE-së në Shqipëri në blerjen e vilës.
