Në Janar 2020, në Kosovë 30 për qind e qytetarëve mbështesnin shkëmbimin e territoreve mes Kosovës dhe Serbisë, për t’i hapur rrugë antarësimit në OKB.
Kështu thotë Volumi i tretë i raportit mbi pyetësorin “Vox Populi mbi ‘Finalen e Madhe’ mes Kosovës dhe Serbisë’, publikuar nga Instituti Kërkimor për Çështje Evropiane dhe të Zhvillimit (RIDEA).
Përfundimet reflektojnë mendimin e 1107 pjesmarrësve – 90% e të cilëve shqiptarë, 8% serb dhe 2% të grupeve të tjera etnike – në periudhën 20-24 Janar 2020.
— Dialogu Kosovë Serbi
Thuajse 70% e të anketuarve mbështesnin rinisjen e dialogut.
— Bashkimi i Kosovës me Shqipërinë
57% mendojnë se nëse Kosova njihet nga Serbia, ajo nuk duhet të bashkohet me Shqipërinë.
Për shqiptarët, arsyeja kryesore është se e shohin kombin shqiptar më ‘të fortë’ nëse në institucione ndërkombëtare përfaqësohet nga dy shtete.
37% e mbështetën idenë e bashkimit. Në krahasim me rezultatet e anketave të mëparshme të këtij Instituti, ata që mbështesin idenë e bashkimit tani janë më pak.
— Marrëveshja Kosovë Serbi
90% e shqiptarëve të Kosovës dhe 47% e serbëve nuk janë të kënaqur me status-quo-në mes Kosovës dhe Serbisë.
Nga të anketuarit, 78% e të anketuarve kundërshtuan me forcë mundësinë për t’i dhënë pushtet ekzekutiv Asosacionit Serb në Kosovë, nëse Serbia pranon ta njohë Kosovën shtet.
Ndërsa idenë e shkëmbimit të territoreve në këmbim të njohjes së Kosovës e mbështetën 30% e të anketuarve. Thuajse 60% e refuzuan fort këtë ide.
