Anulohet tenderi i rindërtimit të 2500 shtëpive të dëmtuara nga tërmeti

Nga Exit News
Anulohet tenderi i rindërtimit të 2500 shtëpive të dëmtuara nga tërmeti

Fondi Shqiptar i Zhvillimit (FSHZH) ka anuluar tenderin e rindërtimit të 2500 shtëpive të dëmtuara nga tërmeti i 26 nëntorit 2019.

Anulimi është zyrtarizuar në faqen e Agjencisë së Prokurimeve Publike (APP) me njoftim të thjeshtë, pa datë, në të cilin thuhet:

“FSHZH […] bën me dije se, për shkak se të gjitha ofertat e paraqitura janë skualifikuar, procedura anulohet”.

Arsyeja e skualifikimit ka qenë se “ofertat nuk përputheshin me kriteret e përcaktuara”.

Epidemia e koronavirusit dhe gjendja e emergjencës ka bërë që qeveria të pezullojë prokurimet publike, kjo e bën të paqartë se çfarë do të ndodhë me tenderin.

Euronews raportoi duke cituar burime pranë qeverisë se tenderi u anulua prej kostos së lartë të modeleve parafabrikate dhe se procedura do të ribëhet duke ndryshuar aspektet teknike.

Portali i hapur për procesin e rindërtimit, mbetet “në fazë përditësimi” dhe ka më shumë se 1 muaj pa njoftuar lajme të reja, projektet apo planet e rindërtimit.

Tenderi prej 5,2 miliardë lekësh (rreth €43 milionë) ishte hapur më 10 mars.

Ai parashikonte rindërtimin e shtëpive në bashkitë Durrës, Kamëz, Kavajë, Rrogozhinë, Krujë, Kurbin, Lezhë, Mirditë, Shijak dhe Vorë.

Për këtë tender, autoritetet shtynë dy herë afatet e dorëzimit të dokumentave, fillimisht nga data 19 mars në 27 mars e më pas në një mbledhje qeverie, Ministri për Rindërtimin, Arben Ahmetaj, u shpreh se do të kërkohej edhe 10 ditë të tjera.

Në fillim të muajit mars, Ministri Ahmetaj deklaroi se qeveria kishte ndarë 8,7 miliardë lekë fonde (rreth €72 milionë) për FSHZH dhe Bashkinë Tiranë, të cilat si njësi zbatuese do të rindërtonin rreth 3,400 shtëpi:

  • FSHZH 2 500 shtëpi: 683 shtëpi 1+1, 972 shtëpi 1+2 dhe 845 shtëpi 1+3;
  • Bashkia Tiranë 889 shtëpi: 312 shtëpi 1+1, 334 shtëpi 2+1 dhe 243 shtëpi 3+1;

Qeveria është zotuar që rreth 4 mijë familje të mbetura pa strehë për shkak të tërmetit, të presin vitin e ri 2021 në shtëpi të reja dhe cilësore.

Anulimi i tenderit, që parashikon ndërtimin e shumicës së banesave, mund të bëjë që ky premtim të mos mbahet.

Lajme te ngjashme

Më të lexuarat

Dërgo informacion në mënyrë konfidenciale

Nëse keni informacion në interes të publikut mund ta dërgoni te redaksia e Exit duke zgjedhur te mbeteni anonim nëse dëshironi.

Mënyrat e dërgimit >>