Arrestimet e 23 protestuesve — Policia dhe Prokuroria shkelin ligjin

Arrestimet e 23 protestuesve — Policia dhe Prokuroria shkelin ligjin

Edhe pse zbatimi e mbrojtja e të drejtave të njeriut është një nga pesë prioritetet kyçe që duhet të përmbushë qeveria shqiptare për të hapur negociatat e pranimit në BE, qeveria e kryeministrit Edi Rama ka shkelur hapur të drejtat e 23 qytetarëve të cilët u arrestuan gjatë natës pas protestave kundër vendosjes së tarifave për kalimin e Rrugës së Kombit.

Shkeljet ligjore dhe procedurale nga ana e forcave të policisë dhe Prokurorisë janë shpjeguar pjesërisht në një deklaratë të Avokatit të Popullit, lëshuar më 2 prill.

Arrestimi

– 23 qytetarët u arrestuan mes orës 02:00 dhe 03:00 të natës, në Kukës më 1 prill. 13 prej tyre u transportuan në stacione të ndryshme të policisë në Tiranë. Në procesverbale dhe flet-arreste nuk përmendet ora e saktë e arrestimit në Kukës, por përmendet ora e arritjes në Tiranë. Kjo është në kundërshtim me nenin 255, pika 1 të Kodit të Procedurës Penale (KPP) që parashikon:

“Data, ora dhe emri i oficerit të policisë gjyqësore që ka kryer arrestimin ose ndalimin shënohet në procesverbal.”

– Falsifikimi i orarit të arrestimit i ka lejuar prokurorisë që ta referojë çështjen në gjykatë më vonë se afati i lejuar me ligj prej 48 orësh.

Neni 258, pika 2 e Procedurës Penale shkruan:

“[…] prokurori, brenda dyzet e tetë orëve nga arrestimi ose ndalimi, kërkon vleftësimin e masës në gjykatën e vendit ku është kryer arrestimi ose ndalimi. Mosrespektimi i këtij afati bën që arrestimi ose ndalimi të humbasë fuqinë.”

– Avokati i Popullit, po ashtu, zbuloi se disa prej të arrestuarve nuk kishin marrë ushqim deri në orën 18:00 të datës 1 prill, rreth 12 orë më shumë pas arrestimit. Avokati i Popullit theksoi “trajtimin çnjerëzor” të të ndaluarve.

– Anëtarët e familjes së të ndaluarve nuk janë informuar për arrestimin e tyre dhe për shkakun e arrestimit të tyre. Kjo është në kundërshtim me nenin 255, pika 4 e KPP-së që parashikon:

“Policia gjyqësore, me pëlqimin e të arrestuarit ose të ndaluarit, duhet të lajmërojë pa vonesë familjarët. Kur i arrestuari ose i ndaluari është i mitur lajmërohet detyrimisht prindi ose kujdestari.”

LEXO  SHBA fillon sulmet ajrore kundër militantëve të mbështetur nga iranianët në Siri

– Mandatet e arrestit i nënshkruar nga Prokuroria nuk iu vunë në dispozicion Avokatit të Popullit.

– Të arrestuarit u morën në pyetje nga policia pa praninë e një avokati. Kjo është në kundërshtim me nenin 256, pika 1 e KPP-së:

“Prokurori merr në pyetje të arrestuarit ose të ndaluarin në prani të mbrojtësit të zgjedhur ose të caktuar kryesisht.”

Kërkesa zyrtare për vleftësimin e masave parandaluese, dërguar nga Prokuroria e Kukësit në Gjykatën e Shkallës së Parë në Kukës, jep një afat tjetër kohor për arrestimin, midis orës 10:00 dhe 13:00. Siç kemi theksuar më lart, kjo është në kundërshtim me nenin 255, pika 1 të KPP-së.

Kjo hile mund të ketë pasoja të rënda për Prokurorinë, pasi ajo minon ligjshmërinë dhe drejtësinë e gjithë procesit kundër 23 protestuesve. Protestuesit mund të mbështeten në nenin 259, pika 4 të KPP-së që parashikon:

“Kur arrestimi ose ndalimi nuk është i ligjshëm, gjykata vendos lirimin e menjëhershëm të të arrestuarit ose të ndaluarit.”

Siç është e qartë tashmë, as ndalimi dhe aq qëndrimi i tyre në qelitë e paraburgimit nuk janë kryer në mënyrë të ligjshme.

Seancën e vlefshmërisë në gjykatë

Edhe pse seanca për të përcaktuar masat e arrestit për protestuesit duhej të mbahej më 3 prill në orën 09:00, u shty për në datën 4 prill, ora 10:00 dhe u zhvendos në Gjykatën e Tiranës, sepse Gjykata e Kukësit pretendon se nuk ka masat e duhura të sigurisë.

Në Tiranë, qindra forca policie bllokuan Gjykatën e Tiranës, duke i ndaluar deputetët e opozitën të hynin në sallën e gjyqit, përsëri në kundërshtim me ligjin sepse seanca është me dyer të hapura.

Deri më tani, Delegacioni i BE-së në Tiranë, i cili është përgjegjës për monitorimin e zbatimit të sundimit të ligjit dhe zbatimit të të drejtave të njeriut në Shqipëri në funksion të hartimit të Raportit të ardhshëm të Progresit, nuk ka reaguar për ngjarjet.

Lajme te ngjashme

Dërgo informacion në mënyrë konfidenciale

Nëse keni informacion në interes të publikut mund ta dërgoni te redaksia e Exit duke zgjedhur te mbeteni anonim nëse dëshironi.

Mënyrat e dërgimit >>