Kompania AstraZeneca deklaroi se do të takohet këtë të mërkurë me zyrtarë të lartë të BE-së. Në një deklaratë për mediat, një zëdhënës i kompanisë pohoi se takimi do të zhvillohet më vonë.
Ai shtoi se në takim do të marrë pjesë drejtori për Europën dhe Kanadanë i kompanisë.
Më herët, disa zyrtarë të Komisionit Europian pohuan se AstraZeneca kishte refuzuar të takohej me zyrtarët e BE-së.
Kompania do të përgjigjej me shkrim ndaj Komisioneres për Shëndetësinë, Stella Kyriakides, në lidhje me prodhimin e vaksinave.
Pak ditë më parë, kompania AstraZeneca lajmëroi se do të kishte vonesa në shpërndarjen e vaksinës së saj në vendet e BE-së, për shkak të disa vonesave në prodhim.
Kjo ka shkaktuar revoltë nga drejtuesit e shteteve pasi edhe kompania tjetër Pfizer ka ngadalësuar procesin e shpërndërjes së vaksinave anti-Covid, duke shkaktuar paqartësi në planet e vendeve për të vaksinuar popullsinë.
