Policia ka shoqëruar 6 persona si të dyshuar për atentatin me tritol ndaj Preng Gjinit, pasditen e 15 shtatorit në Tiranë.
Mediat kanë raportuar se i plagosuri është jashtë rrezikut për jetën, por nuk është ndërgjegjuar akoma për tu marrë në pyetje nga policia.
Dyshohet se makina me të cilën po lëvizte Gjini ka qenë e kushuririt të tij. 10 minuta përpara shpërthimit ai ka lënë makinën e tij dhe ka marrë atë të kushuririt, ku dhe ka qenë i vendosur tritoli.
Hetimet për ngjarjen po kryhen nga prokurori Leonard Filopati.
Siç Exit News ka shkruar më parë, pista për atentatin e kryer ndaj Preng Gjinit, në Tiranë, më 15 shtator, është përfshirja në pazare droge dhe hakmarrja e vazhdueshme mes dy fiseve Reçi dhe Gjini, në Rrëshen.
Atentati i Gjinit ndodhi një vit pas vrasjes së vëllait të tij, një vit më parë, Armando Gjini.
Që prej vitit 2016 kanë ndodhur 4 vrasje të tjera në Shqipëri, Itali e Belgjikë që tregojnë konfliktet e hershme mes fisit Reçi dhe Gjini dhe rrisin dyshimet për përfshirjen e tyre në trafikun e drogës:
– Në 9 shtator 2016, u vra Sajmir Jaku, ish-drejtori i OSHEE-së, në një lokal të populluar në Rrëshen. Dyshimi kryesor i policisë ishte përfshirja në trafik droge, madje kishte dhe dyshime se Jaku kishte qenë i dënuar në Itali për trafik droge. Në këtë ngjarje, policia dyshoi se ishte përfshirë dhe Kastriot Reçi, por ky dyshim nuk u provua nga policia.
– Në 28 prill të 2017-ës u vra, në Romë, Gasper Reçi, vëllai i viktimës së sotme, edhe ky një personazh problematik, pasi ishte i përfshirë në trafikun e drogës dhe në veprimtari të tjera kriminale.
– Në 6 shtator 2017 u ekzekutua Kreshnik Gjini, nipi i Saimir Jakut, në Belgjikë. Policia belge ngriti dyshimet se vrasja e Gjinit ishte hakmarrje për vrasjen e Gasper Reçit, një vit më parë.
– Më 12 gusht 2019, u ekzektua në qendër të Rrëshenit Armando Gjini, i njohur dhe me emrin Tonin Gjini. Armando Gjini ishte pjesë e grupit të njohur me emrin e drejtuesit të tij, “Met Kananaj”, i cili njihet si një nga trafikantët më të mëdhenj të drogës në Shqipëri.
Në gjitha vrasjet, autorët kanë vepruar me shpejtësi dhe profesionalizëm, duke ngritur dyshime se mund të jenë përdorur dhe vrasës me pagesë. Asnjë prej këtyre vrasjeve nuk është zbardhur plotësisht nga policia.
