Kryetari i PD-së, Lulzim Basha takoi sot ministrin e jashtëm Di Maio. Basha tha pas takimit se e falenderoi Di Maio për ndihmën që Italia i ka dhënë Shqipërisë për përballimin e dëmeve të tërmetit. Pyetjes së gazetarit, nëse do të ulej ose jo në tryezë me Kryeministrin Rama, Basha ju përgjigj:
“Përgjigjen për këtë pyetje e keni marrë. Dhe më vjen keq nuk kam asgjë tjetër për të shtuar përveç asaj që ju kam thënë.
Zhbllokimi i dialogut politik për reformën zgjedhore sipas propozimit të shtatorit, dhe vullneti i qytetarëve përcaktojnë cilësinë e demokracisë dhe jo fotot dhe shfaqjet mes kryetarit të opozitës dhe qeverisë”.
Kujtojmë se plani i propozuar nga PD në shtator është:
1. Për Reformën Zgjedhore duhet fillimisht vullnet politik për të garantuar zgjedhjet demokratike.
2. Procesi i bisedimeve për [reformën zgjedhore] duhet të drejtohet nga përfaqësues ndërkombëtarë të BE-së apo SHBA-ve dhe të mos marrin pjesë persona që janë objekt i hetimeve për vjedhjen e zgjedhjeve.
3. Reforma është e pamjaftueshme për të garantuar zgjedhje të lira dhe të ndershme.
4. Opozita duhet të ketë garancinë shtetërore për barazi të subjekteve zgjedhore dhe zhvillimin e zgjedhjeve demokratike.
5. Opozita duhet të ketë garancinë se qytetarëve do t’i jepet mundësi e vërtetë vendimmarrje të drejtëpërdrejtë, përmes bërjes efektive të referendumeve.
Basha kritikoi qeverinë për përballimin e tërmetit:
“26 nëntori fatkeqësi natyrore që tregoi se sa i papërgatitur është shteti shqiptar për t’ju përgjigjur kësaj fatkeqësie.
Prapë edhe sot jemi të papërgatitur. Do të kishim të njëjtën situatë. Propozimet e opozitës janë të bëshme”.
Kryetari i PD-së shtoi se fokusi i tij dhe i opozitës është “të ndihmojmë njerëzit dhe jo të bëhemi pjesë e një shfaqje që po na turpëron, po shton dhimbjen dhe vuajtjen”.
