Bashkia Pogradec nderon figurën e Kajo Karafilit, i konsideruar kriminel lufte

Nga Exit News
Bashkia Pogradec nderon figurën e Kajo Karafilit, i konsideruar kriminel lufte

Kryetari i Bashkisë Pogradec, Ilir Xhakolli, nxiti reagime ditën e sotme. Ai zhvilloi një ceremoni përkujtimore për figurën kontraverse të Kajo Karafilit, i konsideruar nga regjimi komunist hero i popullit edhe pse i atribuohen disa vrasje që nuk kishin lidhje me luftën nacional-çlirimtare.

Aktiviteti i Bashkisë Pogradec për nderimin e Karafilit u njoftua në web-faqen e saj dhe në të thuhej se do të mbante fjalim përshëndetës edhe vetë kryebashkiaku Xhakolli.

Pas këtij postimi, reagoi studiuesi Erald Kapri, i cili e konsideroi provokim veprimin e kryebashkiakut:

“[…] [Kryebashkiaku Xhakolli] po shkon përtej imagjinatës duke provokuar rëndë familjet që vuajtën gjysmë shekulli përndjekje e persekutime. Me një krenari gati kriminale, i nxitur nga injoranca, ka vendosur sot të bëjë ceremoni zyrtare ndaj një krimineli të sprovuar lufte, vrasësit me pagesë, Kajo Karafilit.”

Zoti Kapri thekson se përpara zhvillimit të aktiviteteve të tilla, kryebashkiaku Xhekolli duhet të reflektonte për faktin se Karafili është personi që ka vrarë një anëtar të familjes Starova, e njohur për patriotizëm në Pogradec.

“Në 1940, Kajo vrau në mes të qytetit patriotin e njohur Neki Starova. […] Ky krim është shënjuar fort në memorien e çdo pogradecari. […] Në 1940 nuk ishte krijuar partia dhe akoma rezistenca e organizuar. Ndaj, (për kryebashkiakun Xhekolli) mjafton ky rast për t’u tërhequr, ndryshe gjeje një justifikim për gjithë ato familje që kërkojnë ende drejtësi.”

Karafili lindi në janar 1920 në fshatin Bllacë të Pogradecit. Ai lidhet me disa vrasje. Në vitin 1936 vrau Sef Agën, të cilin e akuzonte për vdekjen e të atit. Pas vrasjes u arratis në Jugosllavi. Gjatë Luftës së Dytë Botërore u kthye dhe u angazhua në të tjera vrasje, ku njëra prej tyre ishte ajo e Neki bej Starovës në vitin 1940 në Pogradec.

Më vonë u angazhua me çetën e Myslym Pezës, me mbesën e të cilit u fejua, dhe drejtoi disa aksione në zonat e Shqipërisë së Mesme.

Kajo Karafili u vra më 10 janar 1944. Lajmi i vrasjes u dha në shkurt. Sipas komunistëve ai u vra në luftë, por ka pretendime se atë e vrau Ramazan Habili, ish-anëtar i çetës partizane të Myslym Pezës, të cilit partizanët i kishin djegur shtëpinë për faktin se kishte kaluar me Ballin Kombëtar.

Regjimi komunist e nderoi me tituj të ndryshëm madje në vitin 1974 i kushtoi edhe filmin Shtigje Lufte, me skenar të Safet Kurtit e Skënder Plasarit dhe regji të Piro Milkanit. Në film emri i Kajos është kthyer në Kanan dhe rolin e tij e luan Timo Flloko.

2 komente

  1. Sipas Meje 13 Janar, 2020 në 6:44 pm

    Si “i konsideruar”? Qe te dilet me nje percaktim te tille, eshte e nevojshme te ekzistoje nje konsensus i gjere per kete percaktim. Ne te vertete nuk ka nje konsensus te gjere se Kajo Karafili “konsiderohet kriminel lufte”. Konsensus te gjere ka se Neki Starova ishte bashkepunetor i nazizmit, madje per kete nuk ka vetem konsensus por edhe dokumente te vete Rajhut. Per ekzekutuesin e ketij krimineli nazist, ekziston perkundrazi konsiderata e heroit. Pra Kajo Karafili konsiderohet si hero dhe deshmor i atdheut. Ata qe thone se ai “konsiderohet si kriminel lufte”, jane nje pakice kripto naziste, si puna juaj dhe e Erald Kaprit, nje spurdhjak pseudo-historian qe synon te rishkruaje historine sipas interesave te tij fisnore dhe partiake.

  2. Tani 17 Maj, 2020 në 6:16 am

    Shkoi ne France dhe quaji ata qe luftuan kunder Gjermaneve vrases me pagese te hedhin ne gjygj ndersa bashkepunetoreve as qe i ndjehet zeri ndersa ne Shqiperi ballistet Jane ne shtet

Adresa juaj e emailit nuk do bëhet publike.

Lajme te ngjashme