Bashkimi Evropian kërcënoi të mërkurën ndalimin e eksportit të vaksinave COVID-19 në Britani, raporton Reuters.
Njoftimi vjen në një kohë kur europianët po përballen me një valë të tretë të pandemisë, që rrezikon planet për të rifilluar udhëtimet këtë verë.
Numri i vdekjeve të lidhura me COVID në BE arrin 550 000 dhe më pak se një e dhjeta e popullsisë së bllokut është vaksinuar.
Kreu i Komisionit Evropian, Ursula von der Leyen, tha se situata epidemiologjike po përkeqësohej.
“Jemi në krizën e shekullit,” u tha ajo gazetarëve.
“Shohim formimin e kreshtës së një vale të tretë në vendet anëtare dhe e kuptojmë se duhet të përshpejtojmë normat e vaksinimit.”
Von der Leyen tha se rrjedha e vaksinave ishte e qetë me Shtetet e Bashkuara, por transmetoi zhgënjimin për mungesën e dërgesave nga AstraZeneca në Britani.
Ajo tha se 10 milion doza kishin shkuar nga impiantet e BE në ish-shtetin anëtar.
“Jemi akoma duke pritur që dozat të vijnë nga Mbretëria e Bashkuar,” tha Von der Leyen.
Ajo la të kutohet se nëse situata nuk ndryshon, eksporti i ardhshëm i vaksinave do të jetë në proporcion me nivelin e importit të tyre nga pala tjetër.
