Komisioni Europian ka paralajmëruar vendet anëtare të BE për pasojat ligjore me të cilat mund të përballen nëse rekomandojnë marrjen e një doze shtesë të vaksinës kundër COVID-19.
Komisioni Evropian tha se vendet anëtare mund të vendosin veç e veç për një rekomandim të tillë, mirëpo tërhoqi vërejtjen se ato do të mbajnë përgjegjësinë e çdo pasoje ligjore dhe kërkesash për kompensim, në rast se dikush ka efekte anësore të papritura.
Kjo për faktin se dozat shtesë ende nuk janë miratuar nga Agjencia Evropiane e Barnave (EMA).
EMA ka thënë se se duhet të ketë më shumë të dhëna para se të miratojë përdorimin e një doze shtesë.
“Dozat përforcuese aktualisht nuk janë pjesë e autorizimit të vaksinave për COVID-19 dhe ende nuk i janë nënshtruar një vlerësimi shkencor nga EMA në mungesë të të dhënave të mjaftueshme”, tha Komisioni Evropian në një deklaratë për Reuters të enjten.
Tetë vende anëtare të BE kanë rekomanduar marrjen e një doze shtesë dhe disa të tjera pritet të marrin të njëjtin vendim.
Komisioni gjithashtu tha se edhe kompanitë do të kenë përgjegjesi nëse dozat shtesë merren pa miratimin e EMA-s.
“Nëse një efekt anësor pas një doze përforcuese shkaktohet nga problemet e prodhimit, prodhuesi i vaksinave do të mbetet përgjegjës për të”, tha Komisioni.
