Ambasadori i BE-së dhe ambasadorët e shteteve anëtare i kanë bërë thirrje partive politike të mos përdorin gjuhë urrejtjeje, të vetëpërmbahen gjatë fushatës elektorale për zgjedhjet e 25 prillit.
Në një deklaratë të përbashkët, ata theksojnë se zgjedhjet duhet të jenë të ndershme dhe të lira dhe rezultati duhet të pranohet nga partitë.
“Nisja e fushatës zyrtare është rasti që partitë politike dhe kandidatët t’i përqendrojnë debatet e tyre te programet përkatëse politike dhe reformat që synojnë të paraqesin për të përmirësuar jetën e të gjithë qytetarëve.
Në këtë pikë, kujtojmë rëndësinë e dialogut politik konstruktiv dhe gjithëpërfshirës, siç ilustrohet veçanërisht në konsensusin e gjerë ndërpartiak që çoi në marrëveshjen e 5 qershorit të Këshillit Politik mbi reformën zgjedhore. E njëjta frymë duhet të frymëzojë një fushatë elektorale që bazohet në respekt të ndërsjellë, dialog dhe vetëpërmbajtje, si dhe zhvillohet në një mënyrë paqësore, pa retorikë provokuese apo gjuhë urrejtjeje.
Zgjedhjet transparente, gjithëpërfshirëse, të lira dhe të ndershme, si dhe respektimi i rezultatit të tyre, janë të rëndësishme për të siguruar legjitimitetin e Asamblesë dhe qeverisë së re. “
Delegacioni i bën thirrje qytetarëve të marrin pjesë në votime si dhe njofton se do të ketë vëzhguesit e vetë në qendrat e votimit.
