Betohet sot anëtarja e shtatë e Gjykatës Kushtetuese

Nga Exit News
Betohet sot anëtarja e shtatë e Gjykatës Kushtetuese

Sonila Bejtja, anëtarja e shtatë e Gjykatës Kushtetuese do të betohet të martën tek Presidenti.

Bejtja u dekretua të hënën nga presidenti Meta si anëtare e Gjykatës Kushtetuese.

Bejtja ka kandiduar për vendin e lënë bosh nga ish-anëtari Besnik Muçi, në nëntor 2019.

Për këtë vend kishin aplikuar dhe Altin Binaj e Zhaklina Peto.

Binaj u zgjodh anëtar në GjK, pasi kishte kandiduar dhe për një post tjetër. Ndërsa Peto ka paditur KED-in pasi pretendon se është përjashtuar nga gara në kundërshtim me ligjin dhe vullnetin e saj.

Vendimi i KED-it për të hartuar një listë me vetëm një kandidat është shkelje e Kushtetutës dhe ligjit për Gjykatën Kushtetuese.

Fillimisht, neni 125 i Kushtetutës parashikon se anëtarët e Gjykatës Kushtetuese përzgjidhen nga kandidatët të renditur në tri vendet e para, nga lista e KED.

“Anëtarët përzgjidhen ndërmjet kandidatëve të renditur në tri vendet e para të listës nga Këshilli i Emërimeve në Drejtësi, sipas ligjit.”

Kjo gjë përforcohet në Ligjin për Gjykatën Kushtetuese, ku në nenin 7/c parashikon procedurën si zgjidhen anëtarët e GJK nga Presidenti i Republikës.

“Presidenti brenda 30 ditëve nga marrja e listës prej Këshillit të Emërimeve në Drejtësi emëron gjyqtarin e Gjykatës Kushtetuese nga kandidatët e renditur në tre vendet e para të listës.”

Kështu KED duhet të hartonte një listë me tre emra që gara të quhet e vlefshme, në të kundërt duhet të njoftonte presidentin për të rihapur garën.

Lajme te ngjashme

Më të lexuarat

Dërgo informacion në mënyrë konfidenciale

Nëse keni informacion në interes të publikut mund ta dërgoni te redaksia e Exit duke zgjedhur te mbeteni anonim nëse dëshironi.

Mënyrat e dërgimit >>