Britania ka vënë ushtrinë në gatishmëri për të ndihmuar pikat e shitjes së karburantit nga blerësit e panikosur, pas mungesës së ardhjes së cisternave të karburantit nga BE.
“Një numër i kufizuar i cisternave ushtarakë do të vihen në gjendje gatishmërie dhe do të furnizojnë me karburant, në rast mungese”, njoftoi Departamenti për Biznes, Energji dhe Strategji Industriale, të hënën.
Ky problem u shkaktua pasi shoferët e vendeve të BE-së duhet të pajisen me vizë për të hyrë në Britani dhe shoferët britanik të cisternave nuk i mbulojnë dot kërkesat e tregut. Kjp ka sjellë mungesa në furnizimin me naftë të rezervave të vendit.
Drejtuesit ushtarakë do të marrin trajnim të specializuar nëse do të duhet të ndihmojnë pikat tregtare të shitjes së karburantit, nëse kriza nuk lehtësohet në ditët në vijim.
“Nëse kërkohet, personeli ushtarak do t’i sigurojë zinxhirit të furnizimit kapacitet shtesë si një masë e përkohshme për të ndihmuar në lehtësimin e presioneve të shkaktuara nga rritja e kërkesës për karburant”, njoftoi ministri britanik për Energjinë.
Operatorët e karburantit, përfshirë Shell, BP dhe Esso, thanë se kishte “shumë karburant në rafineritë në Mbretërinë e Bashkuar” dhe presin që kërkesa të kthehet në nivelet normale brenda ditëve,.
“Ne do t’i inkurajonim të gjithë të blinin karburant si zakonisht”, shtuan ata në një deklaratë të përbashkët.
Shoqata e Shitësve me Pakicë të Karburantit tha se pothuajse gjysma e 8,000 pompave të karburantit në Mbretërinë e Bashkuar kishin mbetur pa benzinë të dielën, duke fajësuar “blerësit e panikosur”.
Situata ka kujtuar ditët e errëta të viteve 1970, kur problemet e furnizimit me energji çuan në një javë pune tre-ditore dhe racionimin e karburantit në Britani, shkruan AFP.
Ajo të kujton gjithashtu fundin e vitit 2000, kur njerëzit në protestë për çmimet e larta të karburantit bllokuan rafineritë e naftës, duke e bllokuar vendin për javë të tëra.
Qeveria bëri thirrje për qetësi dhe i nxiti njerëzit të blinin benzinë si zakonisht.
