Presidentët e Rusisë dhe Turqisë të mërkurën zhvilluan bisedime për frenimin e dhunës në veriperëndim të Sirisë dhe mbi mundësinë e zgjerimit të kontratës për shitjen e sistemeve ruse të mbrojtjes ushtarake në Turqi, pavarësisht kundërshtimeve të SHBA.
Asnjë udhëheqës nuk bëri ndonjë deklaratë të detajuar për mediat pas bisedimeve, megjithëse Putini falënderoi Erdoganin për vizitën të cilën ai e quajti të dobishme dhe thelbësore.
Zyrtarët turq thanë para takimit se Erdogan do t’i kërkonte Putinit një kthim në armëpushimin e dakorduar vitin e kaluar për t’i dhënë fund sulmit të ushtrisë ruse dhe siriane ndaj luftëtarëve të mbështetur nga Turqia në rajonin Idlib të Sirisë.
“Hapat që bëjmë së bashku në lidhje me Sirinë kanë rëndësi të madhe. Paqja atje varet nga lidhjet Turqi-Rusi,” i tha Erdogan Putinit në fillim të bisedimeve të tyre, raporton Reuters.
Putin bëri vetëm një referencë kalimtare për Sirinë në komentet e tij të para, duke thënë se ishte një nga fushat ku të dy vendet bashkëpunuan mjaft me sukses.
Udhëheqësi rus tha se negociatat me Turqinë ndonjëherë ishin të vështira, por që të dy vendet kishin mësuar se si të gjenin kompromise reciprokisht të dobishme.
Zgjerimi i blerjeve nga Turqia të sistemit rus të mbrojtjes raketore S-400 ishte në axhendë gjithashtu, diçka që Uashingtoni e ka bërë të qartë se kundërshton fuqishëm.
Erdogan i tha Putinit se donte të diskutonte bashkëpunimin e mëtejshëm të mbrojtjes pavarësisht kundërshtimeve të SHBA.
“Në Asamblenë e Përgjithshme të OKB, personat tipikë na pyetën veçanërisht për çështje të caktuara, natyrisht. Ne u dhamë atyre përgjigjen e nevojshme gjithsesi. Nuk është e mundur që ne të tërhiqemi nga hapat që hodhëm. Unë veçanërisht e besoj këtë: është me rëndësi të madhe për ne që të vazhdojmë duke forcuar lidhjet Turqi-Rusi çdo ditë.”, i tha Erdogan Putinit.
Turqia, anëtare e NATO, bleu sistemet ruse të mbrojtjes raketore S-400 në vitin 2019, duke shkaktuar sanksione amerikane kundër industrive të saj mbrojtëse dhe paralajmërime nga Uashingtoni për veprime të mëtejshme nëse blinte më shumë pajisje ruse.
Erdogan javën e kaluar tregoi se Turqia ende synonte të blinte një seri të dytë të S-400, duke thënë se asnjë vend nuk mund të diktonte veprimet e Ankarasë.
