Haki Çako, Drejtori i Përgjithshëm i Policisë së Shtetit, iu përgjigj sot akuzave dhe kërkesës së LSI për shkarkimin e tij:
“Jam duke drejtuar një organizatë të depolitizuar me ligj, jam në krye të detyrës dhe do të vazhdoj të jem në krye të detyrës për sa kohë jam duke e zbatuar atë me përpikëmërinë më të madhe. Jam duke ndjekur të gjithë procesin zgjedhor.”
Zoti Çako theksoi se policia e shtetit është një nga instituticionet e besueshmërisë më të lartë në sigurimin dhe menaxhimin e procesit zgjedhor dhe se transparenca e policisë gjatë kësaj kohe ka qenë maksimale.
Reagimi i Zotit Çako vjen pas akuzave të vazhdueshme ndaj tij nga drejtues të LSI-së.
Dje Zoti Luan Rama kërkoi shkarkimin e Zotit Çako dhe disa drejtuesve të tjerë të policisë me argumentin se kanë mbështetuer dhe mbrojtur bandat që kanë sulmuar mbështetës dhe drejtues lokalë të strukturave të LSI-së.
“E gjitha kjo situatë kriminale e gjen motivin tek thirrjet skandaloze të kryetarit të Rilindjes i cili e fton policinë të punojë për të marrë vota për partinë e tij dhe jo të zbatojë ligjin. Këto raste dëshmojnë edhe njëherë sesa e inkriminuar është një pjesë e strukturave të policisë së shtetit,” deklaroi Zoti Rama.
Ish-kreu i LSI-së, Ilir Meta, po dje, duke vizituar në spital koordinatorin e LSI Fushë-Krujë, i dhunuar nga persona ende të panjohur, tha se këto akte ndodhin “kur policia ka në krye Haki Drogën”.
