Hoffenheim-Bayern luhet ‘me pasa’, shkak ofendimet e tifozëve

Nga Exit News
Hoffenheim-Bayern luhet ‘me pasa’, shkak ofendimet e tifozëve

Në Gjermani, Hoffenheimi dhe Bayerni luajtën të shtunën diçka më pak se 77 minuta lojë. Pjesa e mbetur u kalua me qarkullim të topit mes njëri tjetrit. Shkak u bë një baner dhe koret ofenduese drejtim presidentit të klubit të Hoffenheim, Dietmar Hopp, nga tifozët e Bayernit

Në transfertën me bardheblutë, Bayerni po fitonte thellë 6-0 kur një grup ultras i tyre shfaqi banerin ofendues dhe nisi kore të shumta ndaj Hopp.

Trajneri i Bayernit, Hans-Dieter Flick – ky ish-trajner i Hoffenheimit, 2000-2005 – dhe lojtarët e tjerë iu drejtuan menjëherë tifozëve që ta hiqnin banerin dhe të qetësoheshin. Kësaj përpjekjeje iu bashkuan edhe zyrtarët e klubit, Oliver Kahn dhe Hasan Salihamidzic.

Më pas gjyqtari Christian Dingert ndali lojën dhe pezulloi për rreth 20 minuta ndeshjen. Lojtarët u çuan në dhomat e zhveshjes.

Ndeshja rifilloi në minutën e 77-të, por më tej futbollistët thjesht pasuan me njëri tjetrin dhe pritën sa loja të mbaronte.

Pas ndeshjes, Presidenti i klubit Dietmar Hopp dhe Drejtori i Përgjithshëm i Bayernit, Karl-Heinz Rummenigge zbritën në fushë. Bashkë me lojtarët ata përshëndetën tifozët e Hoffenheimit të cilët mbajtën qetësinë dhe nuk iu përgjigjën dhunshëm ofendimeve.

Pse sulmohet presidenti i Hoffenheim?

Hopp nuk gëzon simpati në Gjermani pavarësisht se falë mbështetjes së tij financiare Hoffenheimi është ngjitur nga kategoritë e ulëta në Bundesligë.

Shkak për këtë është fakti se 79-vjeçari ka thyer rregullin e përgjithshëm (50+1) të futbollit gjerman, ku klubet nuk mund të zotërohen më shumë se 49 për qind të aksioneve nga kompani private.

Përpara vitit 1998 klubet në Gjermani vepronin si organizata jo-fitimprurëse. Kjo ndryshoi kur Federata e Futbollit Gjerman lejoi që klubet të ktheheshin në kompani publike ose private.

Sidoqoftë u vendos që të mbahej një raport ku shumica e aksioneve dhe të drejtës së votës t’i mbetej gjithmonë anëtarësisë së shkuar – kryesisht tifozëve dhe ish-futbollistëve.

Lojtarët dhe zyrtarët e klubeve duke përshëndetur tifozët e Hoffenheim pas ndeshjes.

Klube të tjera të cilat nuk zotërohen nga tifozët janë Bayer Leverkusen (zotërohet nga kompania farmaceutike Bayer) Wolfsburgu (zotërohet nga Volkswagen) dhe RB Leipzig (zotërohet nga Red Bull).

Tifozët e Bayernit nuk janë të vetmit që sulmojnë presidentin e Hoffenheimit. Javën e fundit banera ofendues dhe kore të ngjashme u panë mes tifozëve të Borussia Monchengladbach dhe Borussia Dortmund.

Këta të fundit u ndëshkuan të luajnë pa tifozë në ndeshjet kundër Hoffenheimit për 2 sezonet e ardhshme.

Kampionati gjerman kryesohet aktualisht nga Bayerni. Pas vijnë Leipzig, Dortmund dhe Borussia Monchengladbach.

Lajme te ngjashme

Më të lexuarat

Dërgo informacion në mënyrë konfidenciale

Nëse keni informacion në interes të publikut mund ta dërgoni te redaksia e Exit duke zgjedhur te mbeteni anonim nëse dëshironi.

Mënyrat e dërgimit >>