Kandidati për kryeministër i Lidhjes Demokratike të Kosovës, Avdullah Hoti tha se qeveria e tij ka larguar ndikimin rus në rajon, e sidomos në Kosovë me marrëveshjen e Uashingtonit, raporton Koha.net.
‘’Kemi marrë ftesë në Shtëpinë e Bardhë pak muaj pasi erdhëm në qeveri. Me atë marrëveshje, e kemi largu ndikimin rus, ndikimin e Lindjes në regjion, sidomos në Kosovë. Qytetarët kanë me ia hajrin kësaj marrëveshje. Kjo marrëveshje do t’i shërbejë në të ardhmen qytetarëve’’, tha Hoti.
Ai tha se Kosova është vendi i parë në Ballkanin Perëndimor që ka arritur Marrëveshje për Nxitjen e Investimeve me DFC-në.
Sipas Hotit, marrëveshja e cila ka hyrë në fuqi, do i mundësojë Korporatës së SHBA-së për Zhvillim Ndërkombëtar Financiar që të sjell prodhime financiare në vend. Kjo sipas tij është hap drejt maksimalizimit të efekteve ekonomike nga zotimet e arritura në Uashington.
“Kjo marrëveshje e cila tashmë ka hyrë në fuqi ia mundëson Korporatës së SHBA-së për Zhvillim Ndërkombëtar Financiar (DFC), bankës për zhvillim të SHBA-ve, për të sjellë gamën e prodhimeve financiare në Kosovë, ku përfshihet financimi i borxhit, investimeve në ekuitet, sigurimi i riskut politik dhe grantet për ndihmë teknike”, shkroi Hoti në Facebook.
