Ish-ushtarët e Ushtrisë Çlirimtare të Kosovës protestuan të premten në sheshin “Skënderbej” në Prishtinë, kundër mbajtjes në burg të ish-komandantëve të UÇK-së, nga Gjykata Speciale e Hagës.
Protestuesit mbanin parulla me mbishkrimin “Unë jam veç çlirimtar, kështu më deshi liria”.
Ata kërkuan lirimin e Hashim Thaçit, Kadri Veselit, Jakup Krasniqit dhe Rexhep Selimit nga dhomat e paraburgimit në Hagë.
Gjithashtu, i bënë thirrje qeverisë së Kosovës që të mbajë qëndrim për ish-komandantët e UÇK-së.
Kjo nuk është hera e parë që në vend organizohen protesta në përkrahje të komandantëve të UÇK-së.
Një vit më parë u organizuan protesta të ngjashme, ku veteranët e luftës i quajtën akuzat të pabaza.
Thaçi, Veseli, Krasniqi dhe Selimi akuzohen, nga Gjykata e krimeve lufte në Kosovë, për krime ndaj njerëzimit, pas përfundimit të luftës së Kosovës. Ata ndodhen në paraburgim.
Gjykata e krimeve të luftës në Kosovë, e përbërë nga Dhomat e Specializuara dhe Zyra e Prokurorit të Specializuar në Hagë, u krijua nga parlamenti i Kosovës me insistimin e bashkësisë ndërkombëtare në gusht 2015.
Ajo pasoi një raport të Këshillit të Evropës në 2011 në të cilin Senatori Zviceran Dick Marty adreson krimet e pretenduara të “anëtarëve të Ushtrisë Çlirimtare të Kosovës kundër pakicave etnike dhe rivalëve politikë” nga janari 1998 deri në dhjetor 2000.
