“Paketa anti-shpifje” me ndryshime ligjore në ligjet e mediave “nuk mori në konsideratë rekomandimet e ekspertëve të Këshillit të Evropës”.
Zëri i Amerikës raportoi duke cituar një zëdhënës të Komisionit Evropian se “megjithëse iu bënë ndryshime deri në minutën e fundit” dhe Kryeministri Rama theksoi se ato janë bërë në përputhje të plotë me OSBE-në, “rekomandimet e ekspertëve të Këshillit të Evropës nuk u morën në konsideratë” në variantin përfundimtar.
Zëdhënësi, të cilit Zëri i Amerikës nuk ia zbuloi emrin, tha se “Brukseli do të vazhdojë të punojë nga afër me autoritetet shqiptare, për t’u siguruar që standartet evropiane për lirinë e të shprehurit dhe mediat do të respektohen”.
Një qëndrim të ngjashëm, që rrëzonte pretendimin e Kryeministrit se drafti përfundimtar ishte “100 për qind i dakordësuar me ndërkombëtarët” u hodh poshtë edhe nga Përfaqësuesi i OSBE-së për Lirinë e Medias Harlem Desir në një intervistë eskluzive për Exit News.
Drafti i fundit i miratuar vazhdon të ngjallë shqetësime për kufizimin e lirisë së shprehjes.
