Kërcënimet e mundshme të Shtetit Islamik, ISIS kundër amerikanëve në Afganistan po e detyrojnë ushtrinë amerikane të zhvillojë mënyra të reja për të tërhequr të evakuuarit në aeroportin e Kabulit, tha një zyrtar i lartë amerikan të shtunën, duke shtuar një ndërlikim të ri në përpjekjet tashmë kaotike për të larguar njerëzit nga vendi.
Zyrtari tha se grupeve të vogla të amerikanëve dhe ndoshta civilëve të tjerë do t’u jepen udhëzime specifike se çfarë të bëjnë, përfshirë lëvizjen në pikat e tranzitit ku ato mund të mblidhen nga ushtria, raporton AP.
Ndryshimet vijnë pasi Ambasada Amerikane lëshoi një paralajmërim të ri të shtunën duke u thënë qytetarëve të mos udhëtojnë në aeroportin e Kabulit pa udhëzime individuale nga një përfaqësues i qeverisë amerikane.
Zyrtarët nuk pranuan të japin më shumë detaje rreth kërcënimit të IS, por e përshkruan atë si domethënës. Ata thanë se ende nuk ka pasur sulme të konfirmuara.
Grupi i ISIS ,i cili ka deklaruar prej kohësh dëshirën për të sulmuar Amerikën dhe interesat e SHBA jashtë vendit, ka qenë aktiv në Afganistan për disa vite, duke kryer valë sulmesh të tmerrshme, kryesisht mbi pakicën shiite. Grupi është vënë në shënjestër në mënyrë të përsëritur nga sulmet ajrore amerikane në vitet e fundit, si dhe sulmet e talebanëve. Por zyrtarët thonë se fragmente të grupit janë ende aktive në Afganistan dhe SHBA janë të shqetësuara për ringjalljen e tij në një mënyrë më të gjerë, pasi vendi është nën sundimin përçarës të talebanëve.
Evakuimet në Kabul ndërkohë vazhdojnë, edhe pse jo me ritme të plota për shkak të kaosit në aeroport. Ushtria gjermane tha se një aeroplan u largua nga Kabuli të shtunën me 205 të evakuuar, ndërsa një aeroplan i dytë mbante vetëm 20. Ministria italiane e Mbrojtjes njoftoi të shtunën evakuimin e 211 afganëve, duke e çuar në 2, 00 numrin e punëtorëve afganë në misionet italiane dhe familjet e tyre që janë evakuuar.
Të premten, Kryeministri britanik Boris Johnson tha se rreth 1.000 njerëz në ditë po evakuoheshin.
Një gjeneral i ushtrisë amerikane u tha gazetarëve në Pentagon të shtunën se SHBA ka evakuuar 17 000 njerëz përmes aeroportit të Kabulit që nga 15 gushti. Rreth 2 500 kanë qenë amerikanë, tha ai. Zyrtarët amerikanë kanë vlerësuar se ka afro 15 000 amerikanë në Afganistan, por pranojnë se ata nuk kanë një numër të saktë.
