Këshilli i Sigurimit të OKB-së u mblodh të dielën për të diskutuar luftimet në Gaza, për shkak të rindezjes së konfliktit mes Izraelit dhe Palestinës.
Sekretari i Përgjithshëm i OKB-së, Antonio Guterres i cilësoi luftimet si “të tmerrshme” dhe bëri thirrje të ndalen luftimet mes palëve. raporton Reuters.
Guterres deklaroi se Kombet e Bashkuara “po angazhojnë në mënyrë aktive të gjitha palët drejt një armëpushimi të menjëhershëm”.
Ai po ashtu u bëri palëve “të lejojnë përpjekjet e ndërmjetësimit të intensifikohen dhe të kenë sukses”.
Ministri i Jashtëm palestinez, Riyad al-Malki i tha Këshillit të Sigurimit se deklaratat e përfaqësive të huaja, për të drejtën e Izraelit për të mbrojtur veten, vetëm sa e inkurajojnë atë “të vazhdojë vrasjen e familjeve të tëra në gjumë”.
Ambasadori izraelit, Gilad Erdan deklaroi se përgjigjja e Izraelit ndaj sulmeve pa kriter nga Hamas respektonte rreptësisht ligjin ndërkombëtar.
“Izraeli përdor raketat e tij për të mbrojtur fëmijët e tij. Hamas përdor fëmijët për të mbrojtur raketat e tij,” tha Erdan.
Këshilli i Sigurimit nuk ka dal ende një deklaratë të përbashkët publike qysh nga fillimi i sulmeve, pasi SHBA-të – aleat i Izraelit – nuk beson se do të ishte e dobishme.
“Ne i bëjmë thirrje SH.B.A.-ve të mbajnë përgjegjësi, të marrin një pozicion të drejtë dhe së bashku me shumicën e bashkësisë ndërkombëtare, të mbështesin Këshillin e Sigurimit në lehtësimin e situatës,” tha Ministri i Jashtëm kinez, Wang Yi.
Yi kryesoi takimin e së dielës pasi Kina është presidente e KS për majin.
“Lëshimet duhet të bëhen si një çmim që duhet të paguhet për paqen, në mënyrë që t’i kursejmë njerëzit nga çmimi i rëndë i luftës,” u shpreh para KS Ministri i Jashtëm egjiptian, Sameh Shoukry.
Përpjekjet për armëpushim nga Egjipti, Katari dhe Kombet e Bashkuara deri më tani, nuk kanë patur sukses.
