Koment: Rama lufton të shesë Open Balkans si pjellë të Procesit të Berlinit

Nga Rezarta Caushaj
Koment: Rama lufton të shesë Open Balkans si pjellë të Procesit të Berlinit

Kryeministri Rama, gjatë konferencës së përbashkët për shtyp me kancelaren gjermane Angela Merkel ka qënë në siklet të shpjegojë projektin Open Balkans në raport me Procesin e Berlinit.

Në fakt, Rama dukej në siklet edhe më herët, para se pyetjet e gazetarëve ta shtynin kancelaren Merkel që të sqaronte se Open Balkans praktikisht nuk ishte nismë e Procesit të Berlinit dhe se prioritet kishte Tregu i Përbashkët Rajonal.

Në fakt, në një moment Merkel u shpreh për bashkëpunimin në rajon: “Nëse ju dëshironi të takoheni, mund të takoheni.”

Qëndrimi i Ramë ishte i kuptueshëm, pasi ai ka bërë përpjekje të shumta që t’ia shiste projektin e Minishengenit si një projet që kishte bekimin e BE-së dhe veçanërisht Gjermanisë.

Exit ishte e para media muaji e shkuar që vuri në dukje se deklarata joformale e Gjermanisë që shprehu mbështetje për Tregun e Përbashkët Rajonal mes vendeve të Ballkanit Perëndimor, nuk ishte një mbështetje e Open Balkans, por e kundërta.

Por, kryeministrin Rama, të cilin e kapi entuziazmi i rremë ose ra pre e këshillimit të dobët, e interpretoi si mbështetje të hapur. Ai e përdori atë për të tallur kritikët e tij.

Rama nuk ishte i vetmi, pasi shumica e mediave e interpretuan njëlloj, përfshirë edhe disa media opozitare. Ato do të ndryshonin qëndrim sapo u shfaqën argumentet e para mbi mbështetjen gjermane.

Në Tiranë u hap një debat nëse Gjermania po ofronte apo jo mbështetje mbi Open Balkans, i cili do të vazhdonte derisa ajo të dilte me një qëndrim zyrtar, që vështirë mund të ngatërrohej.

Gjermania kërkonte zbatimin e marrëveshjes mbi Tregun e Përbashkët Rajonal dhe e bënte të qartë se problemi me Minishengenin e riemërtuar ishte mungesa e gjithëpërfshirjes. Kjo e fundit ishte një fjalë e zbutur, për të mos thënë se projekti ishte përjashtues.

Tre nga gjashtë vendet e rajonit jo vetëm ishin jo të gatshme të bashkoheshin, por nuk jepnin shpresa se do të ndryshonin qëndrim në të ardhmen.

Qëndrimi i dhembi Ramës, i cili e shprehu pakënaqësinë në Forumin e Bledit, ku shënjestroi gjermanët për mungesën e humorit.

Një javë më vonë, zyrtar të BE-së në Bruksel, mes të cilëve i Dërguari i Posaçëm për Dialogun Kosovë-Serbi, Miroslav Lajçak e quajtën projektin përçarës.

Kjo ishte arsyeja përsa sapo kancelarja Merkel i dha fund dilemës, Rama nxitoi të ndërhynte për të marr nën kontroll narrativën.

Përkundër asaj çka Merkel sapo pohoi, ai deklaroi se Open Balkans ishte një pjellë e Procesit të Berlinit e jo në kontradiktë me të.

Ai e quajti “një mekanizëm për ta përshpejtuar Procesin e Berlinit” dhe pikëpyetjet mbi këtë çështje ishin konspiracion. Dhe nëse Procesi i Berlinit shërben për të përshpejtuar integrimin në BE, i bie që Open Balkans po përshpejton… përshpejtimin?!

Duke e bërë deklaratën në konferencën me Merkel, Rama kërkon ta bëj atë të besueshme.

Ai po i thotë publikut të pavëmendshëm se, nëse nuk do qëndronin gjërat ndryshe, Merkel do ta korrigjonte.

Por, gjuha diplomatike nuk funksionon në atë mënyrë: Merkel e dha mesazhin e saj dhe ai ishte i qartë.

LEXO  Rama njofton krijimin e “autoritetit të përkohshëm licensues” për plazhet private

Nuk ka konspiracion në qëndrimin e Gjermanisë dhe BE-së.

Merkel-it dhe BE-së nuk i ka shpëtuar fakti që dyshja Rama-Vuçiç, me një Zaev që duket i tepërt, nuk frymëzojnë bashkëpunim dhe më shumë se gjithçka, e përdorin Open Balkans në funksion të propagandës e politikës së brendshme.

Të parët duan t’i hedhin hi syve të evropianëve duke simuluar etërit themelues të BE-së, Schummann – Adenauer, të cilët lanë pas të shkuarën konfliktuale mes vendeve të tyre për të parë nga e ardhmja.

Është një mit që Rama kërkon ta imponojë pothuajse me forcë, si për t’i thënë Evropës se ajo e ka humbur busullën dhe se vlerat që ajo po humbet, po ringjallen në Ballkan. Në këtë kuadër mund të interpretohen të gjitha qortimet që Rama i ka bërë Bllokut, duke shfrytëzuar pranimin e strehimit të emigrantëve afgan në vend.

Apo, edhe së fundmi, në konferencën e së martës me Merkel, ku ai përsëriti se Evropa kishte ngelur peng i nacionalizmave, duke iu referuar vetos bullgare ndaj hapjes së negociatave të BE-së me Maqedoninë e Veriut, që penalizoi edhe Shqipërinë.

Këto deklarata ndryshojnë nga ato të vetëm pak muajve më parë, kur Rama shprehej se integrimi i vendit do të ecte dorazi më atë të Maqedonisë së Veriut.

Problem po aq i madh me Open Balkans përbën mënyra se si Rama kërkon ta përdorë atë kundër BE-së, duke marr nën kontroll narrativën e procesit të integrimit. Open Balkans nuk kontrollohet nga BE-ja, ndërsa integrimi po. Edhe Tregu i Përbashkët Rajonal po ashtu.

Ndaj edhe takimet e shpeshtëzuara Rama-Vuçiç-Zaev, para dhe pas dështimit për hapjen e negociatave, nuk ishin një koiçidencë.

Metodologjia e re e zgjerimit të BE-së ofron pak “karrota” për qeverinë në të ardhmen, që u kuptua nga binjakëzimi me Maqedoninë e Veriut, duke i hequr kryeministrit një kartë të fortë propagandistike. Me Open Balkans, ai ishte i vendosur që ta rifitonte këtë kartë në formën e presonit ndaj BE-së.

Rama përsëriti para Merkel se vendet e Ballkanit nuk kanë përse të presin që të zhvillohen takime nga BE-ja apo të integrohen në BE, që të ndërtohen autostradat e infrastruktura digjitale.

Kështu, ai tentoi të shmang kriticizmin me referenca ndaj sukseseve të ardhshme të projekteve të përbashkëta me Serbinë dhe Maqedoninë e Veriut, megjithse marrëveshja e parë, ajo mbrojtjen nga katastrofat natyrore, rezultoi një dështim.

Vizita e Merkel e detyroi Ramën të manovronte me këmbë e me duar, pasi u përball me gënjeshtrat e operacioneve tëveta propagandistike, me anë të të cilave ka kërkuar që Open Balkans të kthehej në një “fait accompli”.

Por, e vërteta e thjesht është se gjermanët, duke kuptuar se çfarë e motivon Ramën, nuk e mbështesin Open Balkans dhe Rama nuk është fare i kënaqur me këtë fakt.

 

 

Adresa juaj e emailit nuk do bëhet publike.

Lajme te ngjashme