Komisioni i Venecias shtyn miratimin e opinionit kritik ndaj vetingut, nga presioni i qeverisë shqiptare

Nga Exit News
Komisioni i Venecias shtyn miratimin e opinionit kritik ndaj vetingut, nga presioni i qeverisë shqiptare

Komisioni i Venecias hoqi nga kalendari i tij i punimeve, miratimin e opinionit përfundimtar për emërimet në Gjykatën Kushtetuese parashikuar për t’u shqyrtuar brenda muajit prill.

Shkaku zyrtar është kriza e koronavirusit që ka bërë të pamundur mbledhjet e Komisionit të Venecias.

Por një burim i besueshëm, në dijeni të gjendjes, pohoi për Exit News se shkaku i vërtetë për shtyrjen ka të bëjë me presionin e qeverisë shqiptare, e cila që pas publikimit të draft opinionit ka ndëmarrë një fushatë për të zbutur tonet kritike të opinionit  në lidhje me procesin e vetingut.

Duke qenë se autorët e opinionit kanë refuzuar ta bëjnë këtë gjë, Komisioni ka vendosur ta shtyjë çështjen për të fituar kohë dhe vepruar sipas rrethanave që do të krijohen. Burimi pohoi se “nuk është e përjashtuar që Komisioni të tërhiqet fare nga dhënia e opinionit”.

draft opinionin e lëshuar javën e shkuar, Komisioni kritikon direkt një sërë rregullash e procedurash të ndjekura në procesin e vetingut të magjistratëve.

Në mënyrë të veçantë, Komisioni  thekson se mungesa e afateve të arsyeshme për paraqitjen e prova për pasurinë nga ana e subjekteve dhe hapësirat e mëdha për interpretimin të procedurave të vlerësimit, lënë hapësirë për ndikim politik.

Në draft opinion, Komisioni është shprehur se në disa raste këto probleme mund të kenë krijuar pasoja serioze dhe sugjeron rihapjen e vetingut për raste të caktuara magjistratësh të përjashtuar nga sistemi.

Disa ditë më parë, gjyqtarët shqiptarë i kërkuan Komisionit të Venecias të ruajë në Opinionin përfundimtar të gjitha gjetjet dhe rekomandimet që Komisioni ka bërë në draftin paraprak të Opinionit.

Ata shprehën shqetësimin se drafti përfundimtar mund të ndryshojë si pasojë e trysnisë nga qeveria shqiptare apo Komisioni Europian.

Qeveria shqiptare dhe Komisioni Evropian, të cilët janë hartuesit e reformës në drejtësi, kanë treguar deri tani mungesë totale gadishmërie për të pranuar kritika dhe bërë përmirësime, pavarësisht disa dështimeve serioze të reformës, përfshi mbetjen e vendit pa Gjykatë të Lartë dhe Kushtetuese prej më shumë se dy vjet, çfarë ka sjellë pasoja negative direkte për qytetarët.

Disa persona të përjashtuar padrejtësisht nga vetingu, që e kanë çuar çështjen në Gjykatën e Strasburgut, u shprehën për Exit News se qeveria shqiptare dhe Komisioni po ushtrojnë presion direkt mbi Gjykatën e Strasburgut për të ndikuar vendimet e saj në favor të qeverisë.

Lajme te ngjashme

Më të lexuarat

Dërgo informacion në mënyrë konfidenciale

Nëse keni informacion në interes të publikut mund ta dërgoni te redaksia e Exit duke zgjedhur te mbeteni anonim nëse dëshironi.

Mënyrat e dërgimit >>