Prokurorja Speciale e Kosovës ka hapur një hetim paraprak për sulmin në shtëpinë e Adem Jasharit në fshatin Prekaz, në 5-7 mars 1998, nga forcat ushtarake serbe.
Komandanti i Ushtrisë Çlirimtare të Kosovës Adem Jashari dhe 58 anëtarë të familjes së tij, ndër ta të paktën 28 gra dhe fëmijë u masakruan nga ushtarët serbë.
Prokurorja speciale Drita Hajdari konfirmoi për BIRN se vitin e kaluar ka nisur një hetim dhe tani janë ende në fazën e mbledhjes së të dhënave. Ajo deklaroi se çështja nuk është hetuar asnjëherë nga EULEX, UNMIK apo gjykata e krimeve të luftës në Hagë.
Forcat serbe, në atë kohë e quajtën Adem Jasharin dhe bashkëpunëtorët e tij terrorist. Dhe sulmi ndaj tyre e justifikuan si kundërpërgjigje ndaj sulmit të organizuar nga Jashari ndaj pikave serbe të kontrollit. Jashari u dënua në mungesë nga gjykata serbe, atëherë, për terrorizëm.
Amnisti International gjeti se “të gjitha provat tregonin se sulmi kishte patur qëllim vetëm zhdukjen e Jasharit dhe të familjes së tij”.
Për të kujtuar sulmin e tmerrshëm mbi familjen Jashari, ditën e premte, Parlamenti i Kosovës ka mbajtur një seancë përkujtimore, ndërkohë parada dhe fjalime janë mbajtur në të gjithë Prishtinën. Ndërsa në fundjavë në Prekaz do të ndizen qirinj në kujtim të të humburve.
