Kosova do të lidhë marrëdhënie diplomatike me Izraelin në 1 shkurt.
Ministrja e Punëve të Jashtme të Kosovës Meliza Haradinaj njoftoi në Facebook se do të mbahet një ceremoni online për të firmosur nisjen e marrëdhënive mes dy vendeve.
Ajo i shprehu mirënjohjen SHBA-ve për këtë.
Në 4 shtator Izraeli njohu Kosovën si shtet të pavarur, kur u nënshkrua marrëveshja Kosovë-Serbi në Uashington.
Në një postim në Twitter presidenti i atëhershëm Donald Trump shkroi:
“Një tjetër ditë e shkëlqyer për paqe me Lindjen e Mesme – Kosova dhe Izraeli kanë rënë dakord të normalizojnë marrëdhëniet dhe të vendosin marrëdhënie diplomatike’’.
Kosova ka rënë dakord të hapë ambasadën e saj në Jeruzalem, në marrëveshjen e dakordësuar me presidentin Trump.
