Kosova nuk anëtarësohet në INTERPOL, Serbia feston suksesin

Kosova nuk anëtarësohet në INTERPOL, Serbia feston suksesin

Kosova dështoi për herë të katërt të anëtarësohet Organizatën Ndërkombëtare të Policisë e njohur si INTERPOL. Kosova, në dy votime të zhvilluara sot, nuk mundi të marrë dy të tretat e votave të nevojshme për tu anëtarësuar.

Qeveria kosovare shprehu zhgënjimin dhe akuzoi Serbinë për fushatë të egër kundër anëtarësimit të Kosovës:

“Qeveria e Republikës së Kosovës shpreh zhgënjimin e saj të thellë që Kosovës i është pamundësuar të jetë pjesë e familjes botërore të Policisë, që lufton krimin transnacional. Fushata e egër e Republikës së Serbisë dëshmoi edhe njëherë karakterin e saj kundër Kosovës dhe kundër idesë për normalizim të raporteve me Republikën e Kosovës, aq më parë, kur ky anëtarësim ishte teknik dhe jo politik.”

Të njëjtin qëndrim mbajti dhe Ambasada Amerikane në Kosovë, e cila përmes një deklarate për shtyp u shpreh:

“Shumica e vendeve e kanë parë këtë gjë dhe e kanë mbështetur kërkesën e Kosovës për anëtarësim në INTERPOL, përkundër fushatës, të udhëhequr nga Serbia, për t’iu bërë presion vendeve për ta kundërshtuar kërkesën e Kosovës.”

Ndërkohë Presidenti serb Aleksandar Vuçiç e quajti dështimin e Kosovës, fitore për Serbinë.

Në një konferencë për shtyp, direkt pas votimit në INTERPOL, Vuçiç tha se kjo është “fitorja e një vendi të vogël, sfidues dhe krenar, që do të thotë se Serbia ka forcuar pozitën e saj.”

“Serbia nuk është një vend i lehtë për tu mundur, për tu turpëruar dhe shkelur”, vijoi ai më tej.

LEXO  Balla: Shqipërisë i duhet transparenca e pronësisë së medias

Kosova ka aplikuar për tu bërë anëtare në INTERPOL katër herë, në vitin 2010, 2015, 2017 dhe sot në 2018-ën.

Lajme te ngjashme