Komisioni Qendror i Zgjedhjeve në Kosovë ka nisur verifikimin e kandidatëve për deputet në zgjedhjet e 14 shkurtit.
Zëdhënësi i KQZ-së, Valmir Elezi, deklaroi në një konferencë për media se ky institucion u ka dërguar shkresa gjashtë institucioneve, për të verifikuar përshtatshmërinë e kandidatëve për deputetë.
Shkresat janë dërguar në: Policinë e Kosovës, Ministrinë e Mbrojtjes, Agjencinë Kosovare për Inteligjencë, Ministrinë e Punëve të Jashtme, Këshillin Gjyqësor të Kosovës dhe Panelin Zgjedhor për Ankesa dhe Parashtresa.
“Kemi kërkuar nga Këshilli Gjyqësor i Kosovës të na i dërgojë emrat nga lista e kandidatëve nëse janë gjykatës, nëse janë subjekt i vendimit të gjykatës me të cilin u është hequr e drejta për të qenë kandidatë dhe nëse janë shpallur fajtorë me vendim të gjykatës në tre vjetët e fundit”, tha Elezi.
Sipas ligjit, ata persona që janë dënuar për një vepër penale në 3 vitet e fundit, nuk mund të kandidojnë për deputet.
Partitë dhe koalicionet kanë dorëzuar në KQZ listat e tyre me kandidatë.
Në total numri i kandidatëve është 1,079 propozuar nga 21 parti politike, dy koalicione parazgjedhore dhe pesë iniciativa qytetare.
Procesi i verifikimit do të përfshijë institucione të tilla si Këshilli Gjyqësor i Kosovës, Paneli Zgjedhor për Ankesa dhe Parashtresa, Ministrinë e Punëve të Brendshme, Agjencia e Kosovës për Inteligjencë, Ministrinë e Jashtme dhe atë të Mbrojtjes.
Klikoni këtu për të lexuar listat e propozuara nga Vetëvendosja dhe PDK.
