Kreu i ri i Institutit të Krimeve të Komunizmit dënon nderimin e Haxhi Lleshit

Nga Redaksia
Kreu i ri i Institutit të Krimeve të Komunizmit dënon nderimin e Haxhi Lleshit

Çelo Hoxha, kreu i sapozgjedhur i Institutit të Studimeve të Krimeve dhe Pasojave të Komunizmit, dënoi nderimin me titullin “Nderi i Qarkut Dibër” të Haxhi Lleshit, ish-kryetar i Presidiumit të Kuvendit Popullor dhe një prej të besuarve të diktatorit Enver Hoxha.

Në një intervistë për News 24, Çelo Hoxha deklaroi se Haxhi Lleshi është firmëtar i të gjitha vrasjeve politike të ndodhura nga viti 1953 e derisa drejtoi Presidencën e Kuvendit Popullor, në vitin 1982:

“Haxhi Lleshi përfshihet në listën e përpiluar nga Instituti i Studimit të Krimeve dhe Pasojave të Komunizmit, që përmbledh pjesëmarrësit që kanë përgjegjësi direkte për krimet e Partisë Komuniste Shqiptare dhe të Ushtrisë Nacional Çlirimtare.

Në vitin 1995 me dekret të Presidentit të Republikës, Haxhi Lleshit iu hoqën të gjitha dekoratat dhe titujt e nderit për aktin kriminal të gjenocidit të ushtruar ndaj popullit shqiptar gjatë viteve të diktaturës komuniste.”

Çelo Hoxha tha se vendimi i Bashkisë Dibër për të nderuar Haxhi Lleshin, bie ndesh me ligjet në fuqi që dënojnë krimet e komunizmit.

Ai shprehu domosdoshmërinë e miratimit të dy ligjeve nga parlamenti shqiptar, ligjit të Lustracionit dhe Dekomunistizimit, si e vetmja mënyrë për të mos i vlerësuar dhe glorifikuar më personat që kanë kryer krime gjatë diktaturës.

LEXO  30 vjet më pas vazhdon persekutimi i antikomunistëve

Lajme te ngjashme

Më të lexuarat

Dërgo informacion në mënyrë konfidenciale

Nëse keni informacion në interes të publikut mund ta dërgoni te redaksia e Exit duke zgjedhur te mbeteni anonim nëse dëshironi.

Mënyrat e dërgimit >>