Kryetarja e Gjykatës së Durrësit Joana Qeleshi dha sot dorëheqjen nga posti i gjyqtares. Sipas disa mediave arsyeja e dorëheqjes është një pozicion i ri si drejtuese juridike në një spital privat.
Zonja Qeleshi nisi punën si gjyqtare në Gjykatën e Durrësit më 28 dhjetor 2011 dhe në vitin 2013 Këshilli i Lartë i Drejtësisë e emëroi në krye të kësaj gjykate.
Gjyqtarja Qeleshi nuk ka kaluar ende procesin e vetingut, por është akuzuar shpesh për vendime të dyshimta.
Në vitin 2016 ish ministri i Drejtësisë Ylli Manjani kërkoi shkarkimin e saj për shkak se zonja Qeleshi mori vendim në shkelje të ligjit dhe të procedurës së gjykimit. Ajo i dha një tokë me sipërfaqe 45 mijë m2 tokë në Gjirin e Lalëzit një familje e cila nuk kishte dokumenta bindëse për të vërtetuar pronësinë duke larguar kështu investitorët e huaj libanez që do të do të ndërtonin një kompleks turistik në atë zonë.
Së fundmi në drejtimin e gjyqtares Qeleshi, Gjykata e Durrësit konfirmoi në mënyrë të paligjshme mandatin e kryebashkiakes së dalë nga zgjedhjet e 30 qershorit Valbona Sako.
Mbas refuzimit të gjyqtares Mimoza Margjeka për të njohur mandatin e kryebashkiakes Sako, ish kryebashkiaku Vangjush Dako dhe Valbona Sako takojnë zonjën Qeleshi. Pas këtij takimi, Partia Socialiste dorëzoi në gjykatë kërkesën për shqyrtimin e mandatit.
Kryetarja Joana Qeleshi ka manipuluar shortin duke ia caktuar çështjen gjyqtarit Shpëtim Reka, një mbështetës i njohur socialist.Ky i fundit i njohu mandatin zonjës Sako, duke shkelur ligjin në mënyrë flagrante.
