Ksamil — Kush është përgjegjësi?

Ksamil — Kush është përgjegjësi?

Pak orë pasi plazhi dhe deti i Ksamilit u mbuluan nga ujërat e zeza, filloi shmangia e përgjegjësisë nga vetja dhe fajësimi i të tjerëve për shpërthimin e kanalizmeve.

një postim në Facebook, deputeti i sapozgjedhur i PS-së Alket Hyseni i bëri thirrje për veprim të menjëhershëm Bashkisë Sarandë dhe Ndërmarrjes së Ujësjellës-Kanalizimeve për hetimin e përgjegjësve. Por, përgjegjësitë ndoshta nuk janë ato që Hyseni mendon.

Bashkia e Sarandës njoftoi se i gjithë projekti për rindërtimin e infrastrukturës së ujësjellës kanalizime në Ksamil ishte tenderuar, zbatuar dhe monitoruar nga Bashkimi Evropian.

Ngjarja e ditës së mërkurë mendohet se ishte si rrjedhojë e mos përfundimit të punimeve apo si pasijë e mos kryerjes së saktë të tyre.

Në vitin 2010, autoriteti kontraktues i cilësuar si “Bashkimi Evropian i përfaqësuar nga Komisioni Evropian, ky i fundit i përfaqësuar për procedurat e këtij tenderi nga Delegacioni i Bashkimit Evropian në Shqipëri, për dhe në emër të qeverisë shqiptare,” afishoi një “Njoftim për Prokurim” për “Projektimin dhe hartimin e dokumentave të tenderit për sistemin e kanalizimit të ujërave të zeza për Vlorën dhe Ksamilin dhe Monitorimin e Punimeve për Vlorën, Ksamilin, Kavajën, Lezhë/Shëngjin” me fondin limit prej 1,8 milionë euro.

Tenderi u fitua nga kompania italiane IRD Engineering, e cila ishte përgjegjëse edhe për monitorimin e “ndërtimit të sistemit të ujërave të zeza në Ksamil,” fakt i bërë publik në faqen zyrtare të kompanisë.

Në vitin 2011, BE njoftoi një tender tjetër, kësaj herë për ndërtimin e sistemit të kanalizmeve të ujërave të zeza. Loti 1 i tenderit ishte për “ndërtimin e kanalizimeve të ujrave të zeza në Vlorë dhe Ksamil”. Sipas njoftimit të fituesit më 26 qershor 2012, kontrata me vlerë rreth 14 milionë euro u fitua nga një kompani italiane Friulana Bitumi Srl së bashku me Atzwanger Spa. Afati i përfundimit të projektit ishte 2 vjet. Por, në të vërtet punimet përfunduan më 31 janar 2017, tre vjet më vonë nga parashikimet.

Ambasadorja e BE-së Romana Vlahutin, pasardhësja e ish-ambasadorit Ettore Sequi, nën autoritetin e të cilit u firmosën kontrata me dy kompanitë italiane, inspektoi punimet e disa projekteve infrastrukturore të financuara nga BE-ja, përfshirë edhe sistemin e kanalizimeve të ujërave të zeza të Vlorës, e cila ishte pjesë e të njëjtës kontartë të fituar nga Friulana Bitumi dhe e supervizuar dhe e projektuar nga IRD Engineering.

Ambasadorja Vlahutin kërkoi siguri që punimet të përfundonin përpara verës. Ambasadorja Vlahutin nuk inspektoi punimet në Ksamil.

LEXO  Tentativë për vrasje ndaj kushuririt të deputetit socialist Harusha

Dy javë më parë, media raportoi ankesat e banorëve të Ksamilit për erën e keqe që vinte nga pusetat e kanalizimeve në rrugë.

Drejtori i Ujësjellësit Sheme Luloi tha se vetë banorët ishin fajtorët sepse ato kanë lidhur tuba të paligjshëm të kullimit me rrjetin kryesor.

Por nëse i gjithë sistemi i kanalizimeve është rregulluar me miliona euro të taksapaguesve evropian, si është e mundur që të vazhdojnë të ekzistojnë këto lidhje të paligjshme?

I njëjti raport deklaron se në afërsi të vendit ku shpërthyen tubat, projekti i BE-së sapo kishte përfunduar, përfshirë edhe 5 stacionet e reja të pompave të lidhura me sistemin e ujrave të zeza. Por, “projekti nuk ishte pranuar nga Bashkia Sarandë”.

Për ta përmbledhur: që në vitin 2012, BE ka shpenzuar miliona euro të taksapaguesve evropian për të ndërtuar një sistem të ujërave të zeza në Ksamil, i cili përfundoi tre vjet më vonë. Në çastin e përfundimit, bashkia nuk e pranoi projektin (nuk e pranoi sepse nuk donte të ishte përgjegjëse për të), duke e lënë projektin praktikisht në duar të BE-së. Dy javë më vonë, një nga tubat shpëtheu, duke shkaktuar përmbytje të zonës dhe dëme ekonomike për Ksamilin.

Exit.al u përpoq në vazhdimësi të lidhej me delegacionin e BE-së në Tiranë dhe kompaninë supervizore IRD Engineering për të komentuar mbi ngjarjen. Por, deri më tani askush nuk është përgjigjur.

Qeveria shqiptare dhe Delegacioni i BE-së vazhdojnë të heshtin.

Lajme te ngjashme

Dërgo informacion në mënyrë konfidenciale

Nëse keni informacion në interes të publikut mund ta dërgoni te redaksia e Exit duke zgjedhur te mbeteni anonim nëse dëshironi.

Mënyrat e dërgimit >>