Dje një avion i vogël i drejtuar nga një pilot italian u rrëzua pranë lumit Ishëm. Piloti u arrestua nga policia dhe pranoi se po planifikonte të transportonte 200 kilogramë kanabis pas një muaji.
Dje në mbrëmje, kur tema kryesore e ditës ishte avioni , Ministri i Jashtëm Bushati në një intervistë tha se kryetari i Kuvendit Ilir Meta është një kandidat i fortë për President.
Duket se Kryeministri Rama ka vendosur të tërheqë vëmendjen e qytetarëve përmes Ministrit Bushati me një temë që ka gjithnjë impakt tek qytetarët: Ilir Meta dhe marrëdhënia e tij me Ramën, e ardhmja e aleancës dhe si do të ndahet pushteti mes tyre.
Hedhja e shashkës “Rama-Meta” në të njëjtën kohë kur në disa media qarkulloi lajmi se operacioni i policisë kishte gjasa të ishte dekonspiruar nga ministri i Brendshëm Tahiri, e përforcon dhe më shumë idenë se qeveria po mundohet të zbehë problemin e drogës me thashetheme qeveritare.
Ministri Bushati injoroi totalisht jo vetëm avionin e Ishmit apo akuzat ndaj Ministrit Tahiri, por dhe gjithë problemet e tjera që shoqërojnë atë: vënia në rrezik e sigurisë kombëtare, përmasat gjigante që ka marrë trafiku i drogës në vend dhe sofistikimi i tij, paaftësia e policisë për të parandaluar të tilla ngjarje apo lidhja e bandave narkotrafikante me pushtetin.
