Kryeministri i Kosovës, Albin Kurti të mërkurën i bëri thirrje BE-së për liberalizimin e vizave për qytetarët e Kosovës, para fillimit të Samitit të Sllovenisë.
Ai e cilësoi vonesën “një padrejtësi e madhe” e institucioneve evropiane.
“Kanë kaluar më shumë se tre vjet që kur Komisioni Evropian rekomandoi për të dytën herë liberalizimin e vizave për qytetarët e Kosovës. Ka qenë një padrejtësi e madhe, mungesë e drejtësisë karshi qytetarëve tanë që kanë vuajtur shumë,” u shpreh Kurti për gazetarët.
Ai shtoi se shpresonte që BE-ja të vazhdontë projektin e zgjerimit, duke i qëndruar “esencës së vet”.
“Si projekti më i madh historik i paqes dhe prosperitetit që nga lufta e dytë botërore, BE-ja duhet të zgjerohet që të jetë Evropë. Ballkani Perëndimor i mungon BE-së për t’u bërë Evropë”, përfundoi ai.
Kurti ka ritheksuar mbështetjen e besnikërinë e Kosovës ndaj BE-së, përkundër vonesave dhe se nuk ka asnjë rrezik që vendi të riprientohet kah Rusisë e Kinës.
Ndërkohë, ai ka rikonfirmuar edhe qëndrimin mbi marrëveshjen Kosovë-Serbi, ku zgjidhja e vetme mund të jetë vetëm njohja.
