Lojë propagandash—Buletini ditor nga fronti

Lojtari Rama

Kryeministri Rama çdo mëngjes e nis ditën duke u shpjeguar shqiptarëve sfidat, arritjet, përjetimet, mendimet dhe thellësinë e qenies e veprimeve të tij përmes citateve të njerëzve të mëdhenj.

Këtë mëngjes, zoti Rama postoi në Facebook disa fjalë, që ai thotë se i ka thënë Thomas Mani, për të na treguar se ka zgjedhur rrugën e duhur në jetë e politikë, ndërkohë që shumica e njerëzve as nuk e kanë idenë se rruga e drejtë ekziston.

Këtë citim të Manit nuk e gjetëm askund dhe kemi frikë se zoti Rama mund t’i jetë kthyer zakonit të vjetër që fjalët e veta i duken se i kanë thënë njerëz të mëdhenj.

Pas këtij postimi, zoti Rama vazhdoi veprimtarinë e tij intelektuale me postimin në Facebook të punimeve të një aktiviteti ndërkombëtar të titulluar “Mendjet e bukura frymëzojnë të tjerët”, të cilin e hapi, e drejtoi dhe e mbylli Eduard Shalsi.

Veç Ramës dhe Shalsit në këtë ngjarje morën pjesë mendje të tjera të bukura të nivelit ministror nga Bosnja, Maqedonia, Serbia e Kosova.

Aktiviteti i mësipërm u organizua nga Këshilli i Bashkëpunimit Rajonal, që drejtohet nga mendja e bukur në trupin e bukur të Majlinda Bregut, dhe Forumi Ekonomik Botëror, me qëllim inagurimin e Përshpejtuesit të Konkurrencës dhe Inovacionit në rajonin e Ballkanit Perëndimor.

Në këtë takim, Kryeministri foli me krenari për PPP-të e tij si shembuj të gjenialitetit novator të atij vetë dhe të mendjeve më të bukura të biznesit shqiptar.

I lodhur nga aktivetet e ngjeshura intelektuale, pasdite Kryeministri  u shlodh duke parë një aktivitet me policë. Përmes faqes në Facebook ai transmetoi një konferencë të Policisë së Shtetit për shpartallimin e rrjeteve të kumarxhinjve që luajnë nëpër kioska, ndërkohë që ai ia ka lënë kumarin me ligj vetëm hoteleve me pesë yje në pronësi të biznesmenëve me katër klasë.

Duke qenë se mbasdite pati dyshime se shqiptarët mund të mos e kishin kuptuar mirë  punën e bukurisë së tij mendore, pasdite Kryeministri postoi edhe një foto të tij në takimin e mendjeve të bukura, të shkrepur nga një kënd ku dukej koka e tij direkt para sfondit me fjalët në anglisht “Mendjet e bukura, frymëzojnë…”

Kryeministri nuk e përdori sot Twitter-in apo mjetet e tjera të propagandës sociale.

Lojtari Basha

Kryedemokrati Lulzim Basha postoi sot në Facebook punimet e një konference, të organizuar me Fondacionin Konrad Adenauer, me titullin inteligjent “Sfida dhe Vizione në Shëndetësi”.

Në këtë takim u shpalos vizioni i PD-së për autonominë e spitaleve, për t’i kthyer spitalet në ndërmarrje, njësoj siç e kishte Rama në vizionin për të ardhmen në vitin 2013.

Në mbrëmje, zoti Basha postoi në Facebook një foto të mëngjesit, teksa është fiksuar në bordurën e shkallëve së Korpusit Universitar duke folur me disa vajza të reja.

Në sqarimin përshkrues të këtij momenti, zoti Basha ka treguar në konfidencë se vajzat e reja në mëngjes e frymëzojnë shumë. Ditë më parë, zoti Basha është parë të frymëzohet mëngjeseve ose duke ngrënë paçe koke me punëtorë, ose duke gjerbur kafen teksa vrapon drejt zyrës.

As zoti Basha nuk e ka prekur Twitter-in me dorë sot.

Fjalë kyçe:   Basha, Propaganda, Rama