Mandati i gjyqtarit Dvorani—Të gjitha faktet

Nga Exit News
Mandati i gjyqtarit Dvorani—Të gjitha faktet

Nesër pritet që Këshilli i Lartë Gjyqësor  të vendosi në lidhje me mbarimin ose jo të mandatit e gjyqtarit të Gjykatës së Lartë, Ardian Dvorani. Presidenti Meta kërkoi disa ditë më parë, përfundimin e madatit të Dvoranit, pasi në Gjykatën e Lartë, u emëruan tre anëtarët e rinj.

Po si rrodhën ngjarjet deri këtu?

Ardian Dvorani është emëruar gjyqtar në Gjykatën e Lartë në Shkurt 2005 dhe mandati i tij 9-vjecar ka përfunduar në Shkurt 2014.

Në vitin 2016, 35 deputetë të Kuvendit i kërkuan Gjykatës Kushtetuese të shprehej mbi përfundimin e mandatit të Dvoranit. Në qershor 2016, Gjykata Kushtetuese, me Vendimin Nr. 55, e shpalli antikushtetues atë pikë të ligjit që lejonte qëndrimin në detyrë pas mbarimit të mandatit të një anëtari të Gjykatës së Lartë derisa ai të zëvendësohej.

Por vendimi i Gjykatës Kushtetuese hyri në fuqi më 12 gusht, kur ai u botua në Fletoren Zyrtare, dy ditë pas hyrjes në fuqi të ndryshimeve të Kushtetutës, të cilat e kishin hequr farë nenin e vazhdimit të mandatit deri në zevendësim, por që nga ana tjetër në dispozitat tranzitore lejonin qëndrimin në detyrë të anëtarëve ekzistues të Gjykatës së Lartë deri në zëvendësimin e tyre.

Edhe pse rasti i tij ishte i pastër—ndryshimet kushtetuese e gjetën Dvoranin në detyrë për shkak të justifikimit të tij me një interpretim ligjor që Gjykata Kushtetuese e hodhi poshtë—Dvorani ka vazhduar të qëndrojë në detyrë, duke vendosur kështu një precedent botëror, duke shërbyer mbi gjashtë vjet pas mbarimit të mandatit.

Në mars të 2019, Gjykata e Lartë pushoi së funksionuari, pasi nga 19 anëtarë mbeti me me 1 anëtar, Ardian Dvoranin.

Më 9 Korrik 2019, KLGJ shpalli tre pozicione të lira në Gjykatën e Lartë, për t’u plotësuar nga rradhët e juristëve të spikatur. Njëri prej tre vendeve ishte edhe ai i Dvoranit. Më 10 Mars të këtij viti, u emëruan tre gjyqtarëve të rinj të Gjykatës së Lartë, Sokol Sadushaj, Ervin Pupe dhe Ilir Panda, duke zëvëndësuar kështu gjyqtarin Ardian Dvorani.

LEXO  Kurti tërhiqet nga ndryshimet e ligjit zgjedhor

Por nuk ndodhi kështu dhe gjyqtari Dvorani, vazhdoi të qëndronte në detyrë.

Më 29 prill 2020, Presidenti Meta i kërkoi KLGJ dhe Gjykatës së Lartë, të shpallin përfundimin e mandatit të gjyqtarit Dvorani.

Në të njëjtën ditë, KLGJ vendosi ti lërë afat, gjyqtarit Dvorani deri të mërkurën, në orën 16.00, për të dhënë një mendim për kërkesën e Presidentit.

Më 30 prill 2020, Dvorani kërkoi tre ditë kohë për të formuluar përgjigjen ndaj kërkesës së Presidentit Meta. Në kërkesën e tij për KLGJ-në, Dvorani kërkon përveç kohës, të shqyrtohet ligjshmëria e zgjedhjes së anëtarëve të rinj të Gjykatës së Lartë, duke krijuar kështu makinacione që legjitimojnë vazhdimin e qendrimit të tij në Gjykatën e Lartë.

Me datë 1 maj 2020, KLGJ miratoi kërkesën e Dvoranit, por në një opinion dërguar KLGJ-së, Komisioni i Zhvillimit të Karrierës argumentoi se gjyqtari Ardian Dvorani do të qëndrojë në detyrë derisa të emërohet anëtari i fundit i Gjykatës së Lartë.

Më 4 maj 2020, Ardian Dvorani argumentoi se KLGJ nuk ka kompetencë të shqyrtojë mandatin e tij. Në përgjigje të kërkesës së Presidentit Meta për mbarimin e mandatit të tij, Dvorani pohon se zëvendësimi në Gjykatën e Lartë nuk bëhet me emra nominal, por me pozicione. Kështu anëtarët e rinj nuk zëvendësojnë nominalisht gjyqtarin Dvoranin.

Lajme te ngjashme