Kancelarja gjermane Angela Merkel ka pranuar ftesën e Presidentit rus Vladimir Putin për të vizituar Moskën më 11 janar.
Sipas mediave ndërkombëtare, vizita do të shfrytëzohet për të biseduar rreth krizës që ka përfshirë Lindjen e Mesme pas vrasjes nga amerikanët të një gjenerali iranian në Irak.
Gjermania dhe Rusia janë dy nga 5 shtetet e mëdha që negociuan marrëveshjen bërthamore me Iranin në vitin 2015-të. Kjo marrëveshje u vu në diskutim prej tërheqjes së njëanshme të SHBA-ve në maj të vitit 2018-të.
Në axhendë do të jenë edhe çështje të tjera si situata në Siri, Libi dhe Ukrainë.
Zëdhënësi i kancelares Merkel, Steffen Seibert, tha se ajo do të shoqërohet në këtë vizitë edhe nga Ministri i Jashtëm Heiko Maas.
Marrëdhëniet mes Rusisë dhe Gjermanisë kanë qenë të tensionuara vitet e shkuara. Aneksimi i Krimesë dhe destabilizimi i Ukrainës prej separatistëve prorusë nxiti rreth 4 vite më parë akuza të hapura nga Berlini.
Në fund të vitit 2017, pas vizitës së Presidentit gjerman Frank Valter Steinmeier, Gjermania dhe Rusia ranë dakord për të përmirësuar marrëdhëniet e tensionuara mes dy vendeve.
