Kanë nisur publikisht përplasjet dhe kundërshtimet e para të vendimeve të Kryeprokurores së Përkohshme Arta Marku.
Zonja Marku vendosi sot ndërprerjen e mandatit të prokurorit të Elbasanit Dritan Gina, bashkëshorti I prokurores Rovena Gashi, e shkarkuar pak javë më parë.
Prokurori Gina u emërua në këtë post nga ish-Kryeprokurori Adriatik Llalla, në 3 nëntor 2016.
Në një konferencë për shtyp, menjëherë pas bërjes publike të lajmit, Dritan Gina ka kundërshtuar vendimin e Markut:
“Refuzoj të zbatoj vendimin e kryeprokurores së përkohshme. Unë nuk jam i komanduar. Jam i caktuar i përkohshëm dhe prokurori i përkohshëm nuk ka tagër ligjor për të më liruar nga detyra. Vendimmarrja i takon Këshillit të lartë të Prokurorisë. Unë nuk e braktis detyrën!”
Prokurori Gina I bëri thirrje dhe kolegëve të tij që të mos lejojnë që pozicioni I tyre “të shërbejë për qoka”, por të zbatojnë ligjin:
“I bëj thirrje dhe kolegëve të jmi që janë në të njëjtin pozicion si unë, të qëndrojnë në lartësinë e detyrës dhe figurës si prokuror i Republikës. Të mos lejojnë që pozicioni i tyre të shërbejë për qoka, apo ta kthejnë prokurorinë në prokurori qokash. Për ti bërë qoka njërit apo tjetrit, ne jemi prokurori dhe duhet të zbatojmë vetëm ligjin.”
Sot, Prokurorja e Përkohshme e Përgjithshme Marku shkarkoi nga detyra dhe prokurorët e Fierit dhe Kukësit.
Ndaj Markut, po sot u bë dhe një padi nga prokurorja Rovena Gashi për shkarkim të padrejtë nga detyra në krye të Sektorit të Dekriminalizimit në Prokurori, pak javë më parë.
