Raportuesi për Ballkanin në Parlamentin Europian, Tonino Picula ka deklaruar se amendamenti për Shqipërinë, i votuar në Parlamentin Europian më 19 qershor, reflekton parakushtet e vendosura nga Këshilli për Shqipërinë në muajin mars.
Amendamenti kujton detyrimin e Shqipërisë për të plotësuar 15 kushte përpara votimit të kuadrit negociues me BE-në.
“Rekomandimet kryesore të Raportit kanë për qëllim vendosjen e theksit tek cilësia e reformave në vendet kandidate dhe kërkesën për rezultate konkrete. Për t’u siguruar që këto reforma janë të qëndrueshme, mekanizmi kushtëzues duhet të përforcohet në mënyrë që procesi i negociimit të mund të ndërpritet në rast se nuk përmbushen premtimet.” – tha Picula.
Demokracia dhe zbatimi i ligjit janë thelbësore në procesin e negociatave për antarësim, ndaj eurodeputeti thekson rëndësinë e diskutimeve për sistemin e drejtësisë, luftën ndaj korrupsionit dhe krimit të organizuar, si dhe respektimit të të drejtave të njeriut dhe lirisë së medias.
