Pas 74 vjetësh, eshtrat e Mid’hat Frashërit do të riatdhesohen në Tiranë në datë 14 nëntor dhe do të vendosen tek varrezat monumentale të vëllezërve Frashëri.
Kërkesa për tërheqjen e eshtrave të mendimtarit shqiptar u bë nga Instituti i Studimeve Historike “Lumo Skëndo”, i themeluar nga deputeti demokrat Agron Shehaj dhe studiuesi i njohur Uran Butka.
“Shqipëria dhe shqiptarët i detyrohen përjetësisht Mid’hadit, pinjollit të denjë të familjes më të rëndësishme në historinë e Shqipërisë.
Në respekt të amanetit të tij, dy vite më parë themeluam me të palodhurin Uran Butka, Institutin e Studimeve Historike “Lumo Skëndo”.
Një ndër nismat e para të Institutit, ishte kërkesa për tërheqjen e eshtrave mendimtarit shqiptar, duke i risjellë në vëmendje shqiptarëve se Shqipëria nuk duhet të jetë vendi tek i cili shqiptarët kthehen vetëm për t’u prehur, por adheu nga i cili ata nuk duhen të largohen kurrë. Nën kujdesin e Uran Butkës, kemi filluar botimin e veprës së plotë të Mid’hadit”. — shkruan deputeti demokrat Agron Shehaj.
Nën mbështetjen e Institutit “Lumo Skendo”, në 7 nëntor përfundoi edhe skulptura e Mid’hat Frashërit e realizuar nga skulptori i nderuar Agim Rada.
