Përmbytet parkimi €6 milionë eurosh i stadiumit Air Albania

Nga Exit News
Përmbytet parkimi €6 milionë eurosh i stadiumit Air Albania

Parkimi nëntokësor në stadiumin kombëtar Air Albania është përmbytur, pas reshjeve të orëve të fundit.

Burime për Exit News njoftuan se kati i dytë nëntokë është mbyllur dhe aty nuk lejohet më parkimi i makinave.

Në foto dallohet dhe problemet që ka shkaktuar uji në muret e parkimit dhe në strukurën e shkallëve.

Ky parkim i ka kushtuar qytetarëve të Tiranës rreth 6 milionë euro, dhënë klientëve të zakonshëm të Ramës e Veliajt, përmes tenderëve të dyshimtë.

Punonjësit e parkimit kanë vënë një pompë thithëse për largimin e ujit, por dëmet në mure janë bërë. Për më tepër, pritet që reshjet e shiut të shtohen në ditët në vijim, duke e bërë më të vështirë menaxhimin e situatës.

Screen Shot at PM
Foto nga brenda parkimit nëntokësor të stadiumit Air Albania
Screen Shot at PM
Foto nga brenda parkimit nëntokësor të stadiumit Air Albania
Screen Shot at PM
Foto nga brenda parkimit nëntokësor të stadiumit Air Albania

Punimet për parkimin nëntokësor kanë nisur nga kompania AlbStar që me nisjen e punimeve për stadiumin, në vitin 2018.

Në janar 2018, Bashkia Tiranë i dha fillimisht 2,5 milionë euro Albstar shpk, kompanisë që ndërtoi stadiumin e ri, për ndërtimin e parkimit nëntokësor në Sheshin Italia, para stadiumit.

Ndërsa projektimi i parkimit ka kushtuar rreth 7,6 milionë lekë, afërsisht 57 mijë euro dhe është financuar, gjithashtu nga buxheti i Bashkisë Tiranë.

Projektimi është realizuar nga klientë të zakonshëm të qeverisë Rama, të cilët ndër të tjera kanë projektuar dhe mbikqyrur ndërtimin e stadiumit të ri kombëtar.

Sfera Studio e Artan Shkrelit, ish-këshilltarit të Ramës në mandatin e parë dhe, dhe Marco Casamonti i firmës Archea Associati, projektues i stadiumit të ri kombëtar për llogari të Albstar shpk, janë dhe projektuesit kryesorë të parkimit.

Pas këtyre tenderëve, bashkia i kërkoi qeverisë të shpronësonte një ndërtesë në jug të zonës e më pas miratoi projektin e dytë për rikualifikimin e tij me vlerë 2,4 milionë të tjera, që e çon shifrën vetëm për ndërtimin e parkimit në mbi 5,9 milionë euro.

Të gjitha këto kosto u mbuluan nga buxheti i Bashkisë.

Pas gjithë këtyre tenderave qëndrojnë kompanitë dhe njerëzit pranë Veliajt e Ramës: Artan Shkreli, Arben Dervishaj, Marco Casamonti, Alket Kumaraku, Artan Dervishaj, të cilët përfitojnë punë publike me tendera të tillë të dyshimtë – shpesh edhe në konflikte interesi – falë lidhjeve me pushtetin e Ramës dhe Veliajt.

Pjesë e ekipit projektues ishte edhe Ave Counsulting, kompania e Arben Dervishaj, shefi i sektorit të infrastrukturës sportive në FSHF dhe supervizori i ndërtimit të stadiumit të ri—me gjasa në konflikt të hapur interesi, pasi ai duhet të supervizonte Albstarin në ndërtimin e stadiumit, ndëkohë që në projektin e parkimit ishte bashkëpunëtor me Albstarin.

Lajme te ngjashme

Më të lexuarat

Dërgo informacion në mënyrë konfidenciale

Nëse keni informacion në interes të publikut mund ta dërgoni te redaksia e Exit duke zgjedhur te mbeteni anonim nëse dëshironi.

Mënyrat e dërgimit >>