Pezullohen pa afat Champions League dhe Europa League

Nga Exit News
Pezullohen pa afat Champions League dhe Europa League

UEFA vendosi të mërkurën të pezullojë pa afat kompeticionet evropiane të futbollit si Champions League dhe Europa League për shkak të pandemisë së koronavirusit. Njësoj u pezulluan edhe ndeshjet kualifikuese të kombëtareve për Euro 2021.

Në mbledhjen e 55 federatave anëtare të UEFA-s është marrë e mirëqenë se në Evropë futbolli nuk mund të rifillojë deri në fund të majit, apo në fillim të qershorit.

Kështu propozimi që mbetet në diskutim është që Champions League e Europa League të shtyhen më tej për t’i dhënë kohë që të përmbyllen kampionatet vendase.

Megjithatë situata e vështirë që po kalojnë – sidomos Spanja e Italia me mbi 20 mijë viktima nga Covid-19 – e bën pothuajse të pamundur që kampionatet e këtyre vendeve të rifillojnë shpejt.

Presidenti i UEFA-s, Aleksander Ceferin u shpreh javën e shkuar, se nëse sezoni nuk rifillon përpara fundit të qershorit atëherë mund të quhet i mbyllur.

UEFA ka pezulluar prej një muaji ndeshjet në Champions League e Europa League, ka shtyrë kampionatin Evropian vitin tjetër dhe po kështu kualifikueset e saj.

Lajme te ngjashme